येरमाळा: श्री येडेश्वरी देवी मंदिर परिसरात पार्किंगच्या शुल्कावरून भाविकांना झालेल्या बेदम मारहाण प्रकरणी अखेर येरमाळा पोलिसांनी गुन्हा दाखल केला आहे. या हिंसक हल्ल्यात आष्टी येथील कीर्तनकार परमेश्वर केरुळकर महाराज, त्यांची पत्नी आणि साले गंभीर जखमी झाले होते. या प्रकरणी पीडित महिलेने दिलेल्या अधिकृत तक्रारीवरून पोलिसांनी गावातीलच चार जणांविरुद्ध गंभीर कलमांखाली गुन्हा नोंदवून तपास सुरू केला आहे.
चेतन झोंबाडे, सोन्या बारकुल, आर्यन कात्रे आणि अमर पवार (सर्व रा. येरमाळा, ता. कळंब, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी रूपाली परमेश्वर केरुळकर (वय ३२) यांनी बुधवारी (दि. ३ जून) येरमाळा पोलीस ठाण्यात रीतसर फिर्याद दिली आहे.
काय घडले होते त्या दिवशी?
पोलिसांनी दिलेल्या माहितीनुसार, बीड जिल्ह्यातील कडा (ता. आष्टी) येथील रहिवासी असलेले केरुळकर कुटुंब मंगळवारी, दि. २ जून रोजी दुपारी तीन वाजेच्या सुमारास श्री येडेश्वरी देवीच्या दर्शनासाठी आले होते. मंदिर परिसरातील पार्किंगमध्ये गाडी लावत असताना, आरोपींनी त्यांच्याकडे बेकायदेशीररित्या पैशांची मागणी केली. यावरून झालेल्या किरकोळ वादाचे रूपांतर मोठ्या हाणामारीत झाले.
लोखंडी रॉडने हल्ला; जीवे मारण्याची दिली धमकी
आरोपींनी गैरकायद्याची मंडळी जमवून फिर्यादी रूपाली यांचे पती परमेश्वर केरुळकर आणि भाऊ अमोल रेडे यांना अश्लील शिवीगाळ करत लाथाबुक्क्यांनी मारहाण करण्यास सुरुवात केली. वाद वाढत गेल्यानंतर आरोपींनी लोखंडी रॉड काढून थेट त्यांच्यावर हल्ला चढवला. यावेळी पती आणि भावाला वाचवण्यासाठी रूपाली केरुळकर या मध्ये पडल्या असता, नराधम आरोपींनी त्यांनाही लाथाबुक्क्यांनी आणि रॉडने बेदम मारहाण करून गंभीर जखमी केले. “जर पुन्हा येथे आलात किंवा पोलिसांकडे गेलात, तर तुम्हाला जिवंत सोडणार नाही,” अशी जाहीर धमकी देत आरोपींनी परिसरात दहशत निर्माण केली.
भारतीय न्याय संहितेनुसार गंभीर गुन्हे नोंद
या घटनेनंतर मंदिर परिसरात एकच खळबळ उडाली होती. जखमींवर उपचार झाल्यानंतर फिर्यादी रूपाली केरुळकर यांनी दिलेल्या प्रथम खबरीवरून (FIR) येरमाळा पोलिसांनी आरोपी चेतन झोंबाडे, सोन्या बारकुल, आर्यन कात्रे आणि अमर पवार यांच्याविरुद्ध भारतीय न्याय संहिता (BNS) कलम ११८(२) (घातक शस्त्राने गंभीर दुखापत करणे), ११५(२), ३५२, ३५१(२)(३) (गुन्हेगारी धमकी) आणि ३(५) अन्वये गुन्हा दाखल केला आहे.
आरोपींच्या शोधासाठी पोलिसांची धडक मोहीम:
पार्किंगच्या नावाखाली भाविकांना लुटणाऱ्या आणि मंदिर परिसराची सुरक्षा धोक्यात आणणाऱ्या या गुंडांचा शोध घेण्यासाठी पोलिसांनी पथके रवाना केली आहेत. या प्रकरणाचा पुढील तपास येरमाळा पोलीस करत असून, भाविकांना सुरक्षा देण्याचे आश्वासन प्रशासनाने दिले आहे.
