तामलवाडी – लोखंडी रॉड, लाठ्या-काठ्या आणि सिमेंटच्या गट्टूने ज्येष्ठ दाम्पत्याला बेदम मारहाण करत जिवे मारण्याची धमकी दिल्याचा धक्कादायक प्रकार खडकवस्ती (ता. तुळजापूर) येथे घडला आहे. बेकायदेशीर जमाव जमवून ही मारहाण करण्यात आली असून, याप्रकरणी तामलवाडी पोलीस ठाण्यात ६ जणांविरुद्ध अट्रॉसिटीसह भारतीय न्याय संहितेच्या विविध कलमांन्वये गुन्हा दाखल करण्यात आला आहे.
अतिश शरद काळे, पंडित मेनकुदळे, शिवलिंगवा मेनकुदळे, शहाजी शिंदे, शालन शिंदे आणि सुरज शिंदे (सर्व रा. खडकवस्ती, ता. तुळजापूर, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी शरद झुंबर काळे (वय ६०, रा. खडकवस्ती) यांनी पोलिसांत फिर्याद दिली आहे.
लोखंडी रॉड, सिमेंटच्या गट्टूने हल्ला
पोलीस सूत्रांकडून मिळालेल्या माहितीनुसार, ४ जून रोजी सायंकाळी ७.३० वाजेच्या सुमारास खडकवस्ती येथे ही घटना घडली. आरोपींनी बेकायदेशीर जमाव जमवून किरकोळ कारणावरून फिर्यादी शरद काळे आणि त्यांच्या पत्नी चित्रा काळे यांना गाठले. आरोपींनी या दाम्पत्याला अश्लील शिवीगाळ करत लाथाबुक्क्यांनी मारहाण करण्यास सुरुवात केली.
हा वाद एवढ्यावरच थांबला नाही, तर संशयितांनी हातातील लोखंडी रॉड, लाठी आणि सिमेंटच्या गट्टूने शरद काळे व त्यांच्या पत्नीवर जबर प्रहार केले. या जीवघेण्या हल्ल्यात हे ज्येष्ठ दाम्पत्य गंभीर जखमी झाले आहे. मारहाण केल्यानंतर ‘तुम्हाला जिवे ठार मारू’, अशी धमकीही आरोपींनी दिली.
तामलवाडी पोलिसांत गुन्हा दाखल
या घटनेनंतर पीडित शरद काळे यांनी १० जून रोजी तामलवाडी पोलीस ठाण्यात अधिकृत फिर्याद दिली. त्यानुसार पोलिसांनी संशयित ६ आरोपींविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(२), ३५१(३), १८App(२), १९१(२), १९१(३), १९० सह अनुसूचित जाती आणि अनुसूचित जमाती (अत्याचार प्रतिबंधक) कायदा (अट्रॉसिटी) कलम ३(१)(आर), ३(१)(एस) अन्वये गुन्हा नोंदवला आहे. या प्रकरणाचा पुढील तपास तामलवाडी पोलीस करत आहेत.
