शिराढोण: नायगाव ते मुरुड रस्त्यावरील ‘रॉयल लॉज’वर सुरु असलेल्या अनैतिक देहविक्रीच्या व्यवसायावर शिराढोण पोलिसांनी गुरुवारी (दि. ११) सायंकाळी धडक छापा टाकला. या कारवाईत पोलिसांनी वेश्या व्यवसायासाठी डांबून ठेवलेल्या दोन पीडित महिलांची सुटका केली असून, लॉज मॅनेजरसह दोन आरोपींना अटक केली आहे. त्यांच्याकडून रोख रकमेसह एकूण १५ हजार ४२० रुपयांचा मुद्देमाल जप्त करण्यात आला आहे.
याप्रकरणी अक्षय दादासाहेब घोगरे आणि लॉज मॅनेजर अजय अच्युत रसाळ (दोघे रा. मुरुड, ता. जि. लातूर) यांच्याविरुद्ध तामलवाडी पोलीस ठाण्यात गुन्हा दाखल करण्यात आला आहे.
असा रचला पोलिसांंनी सापळा…
पोलीस अधीक्षक रितु खोखर आणि अपर पोलीस अधीक्षक सचिन पांडकर यांच्या मार्गदर्शनाखाली शिराढोण पोलीस ठाण्याचे सहाय्यक पोलीस निरीक्षक कोळेकर व त्यांचे पथक हद्दीत गस्तीवर होते. दरम्यान, नायगाव शिवारातील ‘रॉयल लॉज’मध्ये काही महिलांकडून जबरदस्तीने वेश्या व्यवसाय करून घेतला जात असल्याची खात्रीशीर माहिती गुप्त बातमीदाराकडून पोलिसांना मिळाली.
माहितीची खातरजमा करण्यासाठी पोलिसांनी तात्काळ एक बनावट ग्राहक (डिकॉय कस्टमर) लॉजवर पाठवला. तेथे देहविक्री सुरू असल्याचे स्पष्ट होताच, सायंकाळी सव्वासहाच्या सुमारास पोलीस पथकाने लॉजवर अचानक छापा टाकला.
मुद्देमाल जप्त, आरोपी गजाआड
या छाप्यात दोन पीडित महिला मिळून आल्या. महिला पोलिसांच्या मदतीने त्यांची विचारपूस केली असता, आरोपी अक्षय घोगरे आणि मॅनेजर अजय रसाळ हे स्वतःच्या आर्थिक फायद्यासाठी व उपजीविकेसाठी आपल्याला या व्यवसायात ढकलत असल्याचे महिलांनी सांगितले. पोलिसांनी दोन्ही महिलांची सुटका केली असून त्यांची नावे गोपनीय ठेवली आहेत.
कारवाईत काय काय जप्त?
पोलिसांनी घटनास्थळावरून आरोपींचे मोबाईल फोन, लॉजचे नोंदणी रजिस्टर, ५ हजार ३०० रुपयांची रोख रक्कम आणि इतर आक्षेपार्ह साहित्य असा एकूण १५,४२० रुपयांचा मुद्देमाल जप्त केला आहे.
आरोपींविरुद्ध तामलवाडी पोलीस ठाण्यात भारतीय न्याय संहिता (BNS) आणि मानवी अनैतिक व्यापार प्रतिबंधक अधिनियमाच्या (PITA) विविध कलमांखाली गुन्हा नोंदवण्यात आला आहे. ही यशस्वी कामगिरी सपोनि कोळेकर आणि शिराढोण पोलिसांच्या पथकाने केली. या कारवाईमुळे अवैध धंदे करणाऱ्यांचे धाबे दणाणले आहेत.
