मुरुम: लोहारा तालुक्यातील अचलेर तांडा येथे किरकोळ कारणावरून झालेल्या वादाचे पर्यवसान हाणामारीत झाले. बेकायदेशीर मंडळी जमवून एका तरुणाला काठीने व लाथाबुक्क्यांनी बेदम मारहाण केल्याप्रकरणी मुरुम पोलीस ठाण्यात सहा जणांविरुद्ध गुन्हा दाखल करण्यात आला आहे.
मिळालेली माहिती अशी की, दि. १२ जून २०२६ रोजी दुपारी २:०० ते २:३० वाजण्याच्या सुमारास अचलेर तांडा परिसरात ही घटना घडली. फिर्यादी तानाजी बाबू पवार (वय ३०) यांना आरोपींनी जुन्या वादातून किंवा किरकोळ कारणावरून घेरले.
याप्रकरणी संजय बाबु राठोड, सुजित राजु राठोड, अजित सुभाष पवार, रालु लक्ष्मण राठोड, प्रदिप संजय राठोड आणि कमळाबाई राजु राठोड (सर्व रा. अचलेर तांडा) या सहा जणांविरुद्ध तक्रार प्राप्त झाली आहे. आरोपींनी गैरकायद्याची मंडळी जमवून तानाजी पवार यांना अश्लील शिवीगाळ केली. त्यानंतर लाथाबुक्क्यांनी आणि काठीने मारहाण करून त्यांना जखमी केले.
या घटनेनंतर तानाजी पवार यांनी मुरुम पोलीस ठाण्यात धाव घेऊन फिर्याद दिली. त्यांच्या प्रथम खबरेवरून पोलिसांनी सहाही आरोपींविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(२), १८९(२), १९१(२), १९१(३) आणि १९० अन्वये गुन्हा नोंदवला आहे. या घटनेचा पुढील तपास मुरुम पोलीस करत आहेत.
