धाराशिव: जिल्ह्यात अवैध शस्त्रे बाळगणाऱ्यांविरोधात स्थानिक गुन्हे शाखेने (एलसीबी) धडक मोहीम सुरू केली आहे. या मोहिमेंतर्गत आंदोरा येथील हॉटेल निसर्ग समोरून एका ३२ वर्षीय तरुणाला एका गावठी कट्ट्यासह दोन जिवंत काडतुसांसह रंगेहात अटक करण्यात आली आहे. शाम शिवाजी काळे (वय ३२, रा. झगडेगल्ली, भूम, जि. धाराशिव) असे अटक करण्यात आलेल्या आरोपीचे नाव आहे. त्याच्याकडून एकूण ४६ हजार रुपये किमतीचा मुद्देमाल जप्त करण्यात आला आहे.
हॉटेलबाहेर रचला सापळा
मिळालेल्या माहितीनुसार, स्थानिक गुन्हे शाखेचे पथक जिल्ह्यात गस्त घालत असताना , ‘शाम काळे’ हा तरुण आंदोरा येथे जात पंचायतीसाठी आला असून, तो हॉटेल निसर्ग समोर थांबला आहे व त्याच्याकडे गावठी कट्टा असल्याची खात्रीशीर गोपनीय माहिती पोलिसांना मिळाली. पथकाने तातडीने वरिष्ठ अधिकाऱ्यांना पूर्वकल्पना देऊन हॉटेल निसर्ग परिसर गाठला.
कमरेला खोवला होता कट्टा
हॉटेलबाहेर संशयास्पदरीत्या थांबलेल्या शाम काळे याला पोलीस पथकाने अत्यंत शिताफीने ताब्यात घेतले. त्याची अंगझडती घेतली असता, पोलिसांना त्याच्या कमरेला खोवलेला एक लोखंडी धातूचा व लाकडी ग्रीप असलेला गावठी कट्टा आणि पॅन्टच्या खिशात दोन जिवंत काडतुसे मिळून आली. पोलिसांनी कट्टा आणि काडतुसे जप्त करून आरोपीला ताब्यात घेतले असून , त्याची वैद्यकीय तपासणी केल्यानंतर कळंब पोलीस ठाण्यात अवैध शस्त्र बाळगल्याप्रकरणी गुन्हा दाखल करण्यात आला आहे. पुढील कारवाईसाठी त्याला कळंब पोलिसांच्या स्वाधीन करण्यात आले आहे.
ही कामगिरी पोलीस अधीक्षक श्रीमती रितु खोखर, अप्पर पोलीस अधीक्षक सचिन पांडकर यांच्या मार्गदर्शनाखाली, स्थानिक गुन्हे शाखेचे पोलीस निरीक्षक विनोद इज्जपवार, सपोनि सचिन खटके, पोलीस अंमलदार विनोद जानराव, नितीन जाधवर, बबन जाधवर आणि रोहित दंडनाईक यांच्या पथकाने केली आहे.
