नळदुर्ग: तुळजापूर तालुक्यातील व्होर्टी येथील ‘धाराशिव सोलर एनर्जी लिमिटेड’ या कंपनीच्या प्रकल्पातून अज्ञात चोरट्याने ८० हजार रुपये किमतीची केबल वायर चोरून नेल्याची घटना उघडकीस आली आहे. या प्रकरणी नळदुर्ग पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, व्होर्टी येथील सोलर प्रकल्पाच्या सेक्टर क्रमांक १३ आणि १२ मध्ये ही चोरीची घटना घडली. दि. ८ जून २०२६ रोजी पहाटे ३:०० ते ४:३० वाजण्याच्या सुमारास अज्ञात चोरट्याने सुरक्षा यंत्रणेची नजर चुकवून प्रकल्पात प्रवेश केला. चोरट्याने तेथील ८० हजार रुपये किमतीची, दोन हजार मीटर लांबीची (०६ स्केअर एमएमडीसी) केबल वायर कापून चोरून नेली.
या प्रकरणी ‘आय.एम.पी. इम्पोरिअल सिक्युरिटी फोर्स’मध्ये सुपरवायझर म्हणून कार्यरत असलेले प्रेमदास हिरू राठोड (वय ३८, रा. वडाचा तांडा, ता. तुळजापूर) यांनी नळदुर्ग पोलीस ठाण्यात तक्रार दिली. दि. १२ जून २०२६ रोजी त्यांनी दिलेल्या प्रथम खबरेवरून पोलिसांनी अज्ञात व्यक्तीविरुद्ध भारतीय न्याय संहिता (BNS) कलम ३०३(२) अन्वये गुन्हा नोंदवला आहे. नळदुर्ग पोलीस या प्रकरणाचा अधिक तपास करत असून, चोरट्यांचा शोध घेतला जात आहे.
