परंडा: लोकांच्या जीवितास धोका निर्माण होईल अशा पद्धतीने घरात विनापरवाना व बेकायदेशीररी्या कोयते आणि संशयित मोबाईल बाळगणाऱ्या एका ४० वर्षीय इसमावर परंडा पोलिसांनी धडक कारवाई केली आहे. या प्रकरणी परंडा पोलीस ठाण्यात शस्त्र बंदी आदेशाचे उल्लंघन केल्याप्रकरणी गुन्हा दाखल करण्यात आला आहे.
मिळालेल्या माहितीनुसार, सुनील जेजेराम सल्ले (वय ४०, रा. भोत्रा, ता. परंडा, जि. धाराशिव) असे कारवाई करण्यात आलेल्या आरोपीचे नाव आहे. दि. ११ जून २०२६ रोजी रात्री ८:०० वाजण्याच्या सुमारास आरोपीने भोत्रा येथील आपल्या राहत्या घरात मानवी जीविताला धोका निर्माण होऊ शकतो, अशा प्रकारे बेकायदेशीररीत्या धारदार कोयते आणि संशयित मोबाईल जवळ बाळगला असल्याची माहिती पोलिसांना मिळाली होती.
माहिती मिळताच परंडा पोलिसांच्या पथकाने सल्ले याच्या घरावर छापा टाकला. या कारवाईत पोलिसांनी जिल्हाधिकारी धाराशिव यांच्या शस्त्रबंदी आदेशाचे उल्लंघन केल्याप्रकरणी संबंधित कोयते आणि संशयित मोबाईल जप्त केला आहे.
या प्रकरणी परंडा पोलीस ठाण्याचे पोलीस अंमलदार भुजंग आडसुळ यांनी दिलेल्या प्रथम खबरेवरून आरोपी सुनील सल्ले याच्याविरुद्ध शस्त्र कायदा कलम ४, २५ सह महाराष्ट्र पोलीस कायदा कलम ११०, ११२, ११७ आणि १३५ अन्वये गुन्हा नोंदवला आहे. परंडा पोलीस या प्रकरणाचा पुढील तपास करत आहेत.
