मुंबई/दिल्ली: महाराष्ट्राच्या राजकारणातून या घडीची सर्वात मोठी आणि खळबळजनक बातमी समोर येत आहे. शिवसेना ठाकरे गटाला सर्वात मोठा धक्का बसण्याची शक्यता निर्माण झाली आहे. ठाकरे सेनेचे धाराशिवचे फायरब्रँड खासदार ओमराजे निंबाळकर अखेर शिवसेना शिंदे गटात प्रवेश करणार असल्याचे जवळपास निश्चित मानले जात आहे.
गेल्या काही दिवसांपासून ठाकरे गटाचे ९ पैकी ६ खासदार ‘शिंदे’ वाटेवर असल्याची चर्चा राजकीय वर्तुळात रंगली होती. या ‘ऑपरेशन टायगर’ मध्ये ओमराजेंचे नाव आघाडीवर होते. सुरुवातीला ‘तळ्यात-मळ्यात’ असलेल्या ओमराजेंनी आता फायनल गेम मोड ऑन केल्याचे दिसत आहे.
मोबाईल ‘स्विच ऑफ’ आणि थेट दिल्ली वारी!
मंगळवारी मुंबईत ओमराजे यांचे वडील पवनराजे निंबाळकर यांच्या हत्येच्या प्रकरणाचा निकाल लागणार होता, त्यामुळे ते मुंबईत ठाण मांडून होते. मात्र, हा निकाल आता २० जूनपर्यंत पुढे ढकलण्यात आला आहे. निकाल लांबणीवर पडताच ओमराजेंनी थेट दिल्लीची फ्लाईट पकडली असून ते आज दिल्लीत दाखल झाले आहेत. विशेष म्हणजे, सध्या त्यांचा मोबाईल ‘स्विच ऑफ’ येत असल्याने राजकीय सस्पेन्स कमालीचा वाढला आहे.
कट्टर समर्थक आमदार कैलास पाटलांची भूमिका काय?
धाराशिव जिल्ह्यात ठाकरे सेनेचे दोन आमदार आहेत. त्यापैकी धाराशिवचे आमदार आणि ओमराजेंचे कट्टर समर्थक कैलास पाटील यांना या संभाव्य पक्षांतराबाबत विचारले असता, त्यांनी आपल्याला याबाबत कोणतीही कल्पना नसल्याचे सांगितले.
ओमराजेंच्या या बंडखोरीच्या चर्चांदरम्यान कैलास पाटील यांनी आपली निष्ठा जाहीर करत स्पष्ट केले:
“बाकी काहीही असो, आपण मात्र शिवसेना उद्धव ठाकरे पक्षासोबतच आहोत. काल, आज आणि उद्याही आम्ही ठाकरेंसोबतच राहणार!”
खासदारांची ही ‘नॉट रीचेबल’ आणि ‘स्विच ऑफ’ची नवीन खेळी ठाकरे गटाला किती महागात पडणार, हे आता अवघ्या काही तासांतच स्पष्ट होईल!
