धाराशिव | धाराशिव तालुक्यातील येडशी येथील प्रसिद्ध रामलिंग मंदिरात दर्शनासाठी आलेल्या एका भाविकाला अडवून त्याच्याकडील मोबाईल फोन आणि रोख रक्कम जबरदस्तीने हिसकावल्याची घटना समोर आली आहे. या प्रकरणी धाराशिव ग्रामीण पोलीस ठाण्यात चौघांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, ओंकार संतोष देटे (वय २३, रा. बंडी शेगाव, ता. पंढरपूर, जि. सोलापूर) हे आपल्या मित्रांसह येडशी येथील रामलिंग मंदिरात देवदर्शनासाठी आले होते. दर्शनानंतर मंदिराच्या कमानीजवळ असताना आकाश उदय शिंदे, पवन उमेश होवळ (वय २९), रोहन हिरालाल सोनवणे (वय २६, सर्व रा. येडशी, ता. जि. धाराशिव) तसेच आणखी एका अज्ञात इसमाने त्यांना अडवले.
आरोपींनी फिर्यादीजवळील मोबाईल फोन आणि २,३०० रुपये रोख रक्कम जबरदस्तीने हिसकावून घेतल्याचा आरोप फिर्यादीत करण्यात आला आहे.
या प्रकरणी ओंकार देटे यांनी २९ जुलै २०२६ रोजी दिलेल्या फिर्यादीवरून धाराशिव ग्रामीण पोलीस ठाण्यात भारतीय न्याय संहिता (BNS) कलम ३०९(४) अन्वये गुन्हा दाखल करण्यात आला असून, पोलीस पुढील तपास करत आहेत.
