कळंब: धाराशिव जिल्ह्यात तरुण पिढीला नशेच्या खाईत ढकलणाऱ्या ‘एमडी’ (मेफेड्रोन) या अत्यंत घातक अमली पदार्थाची विक्री करणाऱ्या दोघांना स्थानिक गुन्हे शाखेने (LCB) बेड्या ठोकल्या आहेत. कळंब शहरालगत सोमवारी (३ ऑगस्ट) पोलिसांनी ही धडक कारवाई केली असून, संशयितांकडून ११.२१ ग्रॅम एमडी पावडर जप्त करण्यात आली आहे. याप्रकरणी कळंब पोलीस ठाण्यात अमली पदार्थ विरोधी कायद्यानुसार (NDPS) गुन्हा दाखल करण्यात आला आहे.निखिल जाधव आणि अरविंद कांबळे असे अटक करण्यात आलेल्या आरोपींची नावे आहेत.
गेल्या काही दिवसांपासून धाराशिव जिल्ह्यात एमडी या अमली पदार्थाची तरुणांमध्ये मोठ्या प्रमाणावर अवैध विक्री होत असल्याची गोपनीय माहिती पोलिसांना मिळत होती. या गंभीर प्रकारामुळे तरुण पिढी नशेच्या आहारी जात असल्याचे निदर्शनास आल्याने, जिल्ह्याच्या पोलीस अधीक्षक श्रीमती रितू खोकर यांनी स्थानिक गुन्हे शाखेला या प्रकरणाची गोपनीय माहिती काढून कठोर कारवाई करण्याचे आदेश दिले होते.
सापळा रचून ‘एलसीबी’ने आवळल्या मुसक्या
या सूचनेनुसार, ३ ऑगस्ट २०२६ रोजी स्थानिक गुन्हे शाखेचे प्रभारी अधिकारी पोलीस निरीक्षक विनोद इज्जपवार आणि त्यांचे पथक कळंब पोलीस ठाण्याच्या हद्दीत गस्त घालत होते. त्यावेळी त्यांना गुप्त बातमीदाराकडून माहिती मिळाली की, आरोपी निखिल जाधव आणि अरविंद कांबळे हे कळंब-येरमाळा रोडवरील पाझर तलावाजवळ ‘एमडी’ ड्रग्स विक्रीसाठी घेऊन येणार आहेत.
ही विश्वसनीय माहिती मिळताच पोलिसांनी एनडीपीएस (NDPS) कायद्यातील तरतुदींचे तंतोतंत पालन करत, पंचांसह आणि फॉरेन्सिक पथकासह घटनास्थळी सापळा रचला. रस्त्याच्या कडेला दुचाकी लावून संशयितरीत्या उभे असलेल्या दोन्ही आरोपींना पोलिसांनी ताब्यात घेतले.
२९ प्लास्टिक पुड्यांमध्ये सापडले ‘एमडी’ ड्रग्स
पंचांसमक्ष आरोपींची अंगझडती घेतली असता, त्यांच्याकडे २९ पारदर्शक प्लास्टिकच्या पुड्यांमध्ये भरलेली एकूण ११.२१ ग्रॅम पांढऱ्या रंगाची स्फटिक स्वरूपातील ‘एमडी’ (मेफेड्रोन) पावडर आढळून आली. अमली पदार्थ जप्त करून पोलिसांनी दोन्ही आरोपींना बेड्या ठोकल्या.
याप्रकरणी कळंब पोलीस ठाण्यात गुन्हा रजिस्टर क्रमांक ३२६/२०२६ अन्वये एनडीपीएस कायदा कलम ८(क) आणि २२(ब) नुसार गुन्हा दाखल करण्यात आला आहे.
ही धडक कारवाई पोलीस अधीक्षक श्रीमती रितू खोकर, अप्पर पोलीस अधीक्षक सचिन पांडकर आणि पोलीस अधिकारी संजय पवार यांच्या मार्गदर्शनाखाली पार पडली.
स्थानिक गुन्हे शाखेचे पोलीस निरीक्षक विनोद इज्जपवार, सहाय्यक पोलीस निरीक्षक खटके (स्था.गु.शा.), सहाय्यक पोलीस निरीक्षक मगर (कळंब पो.स्टे.) तसेच पोलीस अंमलदार राठोड (३९७), जानराव (३२७), गादेकर (१४३१), जाधवर (१४७९), चौरे (५८४), जाधवर (१६११), ढगारे (१६३१), मुंगळे (१८९३), शेख (८४), माळवे (१८३६), बोईनवाड (५८३), आरब (१२४८) आणि माने (१३४४) यांनी या यशस्वी कामगिरीत सहभाग घेतला.
