धाराशिव | धाराशिवचे खासदार ओमराजे निंबाळकर यांनी नवी दिल्ली येथे भारताचे पंतप्रधान नरेंद्र मोदी यांची भेट घेऊन धाराशिव लोकसभा मतदारसंघातील विविध विकासकामे आणि प्रलंबित प्रश्नांबाबत सविस्तर चर्चा केली. शिवसेना खासदारांसाठी आयोजित करण्यात आलेल्या अल्पोपहार कार्यक्रमात सहभागी झाल्यानंतर ही चर्चा झाली.
खासदार ओमराजे निंबाळकर यांनी आपल्या फेसबुक पोस्टद्वारे या भेटीची माहिती दिली आहे. त्यांनी सांगितले की, धाराशिव लोकसभा मतदारसंघाच्या सर्वांगीण विकासासाठी केंद्र शासनाचे सहकार्य मिळावे, यासाठी पंतप्रधानांसोबत सकारात्मक चर्चा झाली. यावेळी मतदारसंघातील विविध विकासकामांच्या मागण्यांचे निवेदनही त्यांनी पंतप्रधानांकडे सादर केले.
या बैठकीत पंतप्रधान नरेंद्र मोदी यांनी सर्व शिवसेना खासदारांना आपल्या-आपल्या मतदारसंघातील विकासकामे गतीने पूर्ण करण्यासाठी सत्तेचा प्रभावी वापर करण्याचे आवाहन केले. तसेच विकासकामांबाबत कोणतीही अडचण आल्यास थेट पंतप्रधान कार्यालयाशी (PMO) संपर्क साधण्याच्या सूचनाही दिल्या.
संवादादरम्यान पंतप्रधानांनी खासदार ओमराजे निंबाळकर यांच्या नियमित योगाभ्यासाचीही आपुलकीने चौकशी केली आणि त्याबाबत माहिती जाणून घेतल्याचे त्यांनी पोस्टमध्ये नमूद केले आहे.
या भेटीनंतर केंद्र शासनाच्या सहकार्याने धाराशिवच्या विकासासाठी अधिक वेगाने आणि प्रभावीपणे काम करण्याचा निर्धार अधिक दृढ झाल्याची भावना खासदार निंबाळकर यांनी व्यक्त केली.
उल्लेखनीय म्हणजे, २३ जून रोजी ओमराजे निंबाळकर यांनी शिवसेना (ठाकरे गट) सोडून उप मुख्यमंत्री एकनाथ शिंदे यांच्या शिवसेनेत प्रवेश केला होता. त्यानंतर दोन दिवसांपूर्वी त्यांनी केंद्रीय गृहमंत्री अमित शहा यांची भेट घेतली होती. त्यानंतर आता पंतप्रधान नरेंद्र मोदी यांची भेट घेतल्याने त्यांच्या दिल्ली दौऱ्याची राजकीय वर्तुळात चर्चा रंगली आहे. या भेटीदरम्यान त्यांनी धाराशिव जिल्ह्याच्या विकासासाठी विविध मागण्यांचे निवेदन पंतप्रधानांकडे सादर केले आहे.
