सत्तेतून पैसा अन् पैशातून सत्ता! भवानी मातेच्या दरबारात गद्दारी, बकुळाबाईंच्या बोगस साड्या अन् दिवट्या चिरंजीवांचे ‘रील’!

नमस्कार वाचकहो! ‘धाराशिव लाइव्ह’च्या या भन्नाट मालिकेत आज आपण फेसबुक पिंट्या साहेबांच्या ‘कौटुंबिक बिझनेस मॉडेल’चा आणि त्यांच्या राजकीय गद्दारीचा काळाकुट्ट इतिहास उलगडणार आहोत. साहेबांना त्यांच्या वडिलांकडून एकच टेक्निक वारशात मिळाली आहे- “सत्तेतून पैसा आणि पैशातून पुन्हा सत्ता कशी मिळवायची!”

जनतेला फक्त विकासाचे गाजर दाखवायचे, पण प्रत्यक्षात स्वतःच्याच घराचा विकास करायचा, यात साहेबांची ‘मास्टरी’ आहे. पक्षाने जरी मंत्री केले नसले, तरी “मीच या जिल्ह्याचा मुख्यमंत्री आणि मीच पालकमंत्री” असा खोटा रुबाब मिरवणाऱ्या या साहेबांचे ‘विश्वासघातकी राजकारण’ आता चव्हाट्यावर आले आहे.

राजकारणात स्वतःचा स्वार्थ साधण्यासाठी साहेब कोणत्या थराला जाऊ शकतात, याचा प्रत्यय नुकताच आला. साहेबांनी भवानी मातेच्या नगरीतील एका होतकरू युवकाला थेट ‘भवानी मातेची शपथ’ घेऊन आपल्या सैन्यात सामील करून घेतले. पण जेव्हा साहेबांना त्या युवकाचे वाढते वर्चस्व आणि लोकप्रियता दिसू लागली, तेव्हा साहेबांच्या पोटात मळमळायला लागले.

सहन न झाल्याने साहेबांनी अत्यंत निर्दयीपणे त्या युवकाच्या पाठीत खंजीर खुपसला! साहेबांच्या या गद्दारीची ऑडिओ/व्हिडीओ क्लिप सध्या सोशल मीडियावर वाऱ्यासारखी फिरत आहे. पण यावर साहेबांचे निर्लज्ज समर्थन ऐकाल तर डोक्याला हात लावाल! साहेब म्हणतात, “अरे, गुजराती साहेबांनी लोकांना १५ लाख देण्याचे कबूल केले होते, दिले का? राजकारणात असा शब्द फिरवायचा असतो!” ‘कमळाच्या’ बागेत राहून कोणाचा काटा काढायचा, याचं हे भयानक षड्यंत्र साहेबांच्या डोक्यात कायम शिजत असतं.

घराणेशाहीच्या या बिझनेसमध्ये साहेबांनी आधी ‘सौ. बकुळाबाईंना’ मिनी मंत्रालयाच्या अध्यक्षाच्या खुर्चीवर बसवले. आता त्यांचे पुढचे टार्गेट आहे त्यांच्या ‘दिवट्या चिरंजीवाला’ खासदार/आमदार करणे!

पण सूर्यराजे सत्तेत आल्यामुळे साहेबांची मोठी गोची झाली आहे. त्यामुळे आता ‘कमळ’ सोडून दिवट्या चिरंजीवाला अपक्ष म्हणून मैदानात उतरवण्याची आणि ‘खोटे बंड’ दाखवण्याची स्क्रिप्ट तयार होत आहे.

सध्या इमेज बिल्डिंगसाठी ‘दिवटे चिरंजीव’ गावोगावी मेडिकल कॅम्प राबवत आहेत. हे कॅम्प सरकारी खर्चाने सुरू आहेत की स्वतःच्या खिशातून, हे मात्र अद्याप गुलदस्त्यातच आहे!

सर्वात मोठा विनोद म्हणजे, या मेडिकल कॅम्पचे ‘इन्स्टाग्राम रील’ बनवताना चिरंजीव फक्त स्वतःचा आणि आई-बापाचाच (पिंट्या साहेब आणि बकुळाबाई) फोटो टाकत आहेत. ज्या ‘कमळाबाईच्या’ जीवावर हे मोठे झाले, त्या पक्षाच्या एकाही नेत्याचा फोटो तिथे नाही! म्हणजेच, “आम्हीच पक्ष आणि आम्हीच नेते” असा हा सगळा कौटुंबिक इव्हेंट सुरू आहे.

निवडणूक जवळ आली की साहेबांचा खरा बिझनेस सुरू होतो. ‘सौ. बकुळाबाई’ महिलांसाठी बाजारातून ७५ ते १०० रुपये किमतीच्या अत्यंत हलक्या दर्जाच्या साड्या ‘बल्क’ (Bulk) मध्ये विकत घेतात. त्यावर ‘२५०० रुपये’ अशी खोटी छापील किंमत टाकून त्या साड्या महिलांना वाटल्या जातात!

सोबत सेलिब्रेटींना बोलावून फुगड्यांचे कार्यक्रम घेणे, बायकांना तीर्थयात्रा घडवणे असे इव्हेंट करून साहेब थेट ‘मतांचा भाव’ ठरवतात आणि पैसे वाटतात. पण हे पैसे साहेब खिशातून देत नाहीत! एकदा का खुर्ची मिळाली, की १०० टक्के व्याजाने या रकमेची वसुली सुरू होते. बोगस कामे करणे, रस्त्यातून पैसे खाणे हा वसुलीचाच भाग आहे. भवानी नगरीतील’बोगस बसस्टँड’ हे साहेबांच्या या वसुलीचे सर्वात मोठे आणि जिवंत स्मारक आहे!

फेसबुक पिंट्या साहेब, तुम्ही कितीही खोट्या शपथा घ्या, बोगस साड्या वाटा किंवा चिरंजीवांचे रील बनवा… तुम्ही सत्तेतून जो पैसा कमवलाय आणि लोकांचा जो विश्वासघात केलाय, त्याचा हिशोब जनता बरोबर ठेवेल.

कारण विसरू नका… “यह पब्लिक है, सब जाणती है!”