धाराशिव: शहरातील जुना उपळा रोडवरील जीवघेण्या खड्ड्याबाबत काल (सोमवारी) नागरिकांनी होर्डिंग लावून संताप व्यक्त केल्यानंतर, गुत्तेदाराने अवघ्या ५ तासांत खड्डा बुजवला. मात्र, या घाईघाईत केलेल्या ‘निकृष्ट कामाचा उत्कृष्ट नमुना’ आज लगेचच पाहायला मिळाला. काल टाकलेला हा स्लॅब आज खुद्द गुत्तेदाराच्याच काँक्रिट मिक्सर वाहनाच्या वजनाने कोसळल्याचा धक्कादायक प्रकार समोर आला आहे.
होर्डिंग आंदोलनानंतर घाईघाईत उरकले काम
जुना उपळा रोडवरील सर्व्हिस रोडजवळ एक महिना उलटून गेला तरी स्लॅब पडलेला नव्हता. उघड्या खड्ड्यामुळे अपघाताचा धोका वाढल्याने नागरिकांनी काल (सोमवारी) थेट गुत्तेदाराच्या नावाने “मला अजून एक बळी पाहिजे…” असे उपहासात्मक होर्डिंग लावले होते. धाराशिव लाइव्हने याबाबत सर्वप्रथम बातमी प्रकाशित करताच प्रशासनाला जाग आली. यानंतर ‘धाराशिवच्या लाडक्या गुत्तेदाराने’ तात्काळ सूत्रे हलवली आणि अवघ्या ५ तासांत तो खड्डा बुजवून त्यावर स्लॅब टाकला.
अन् गुत्तेदाराच्याच वाहनाने फोडला स्लॅब
आज त्याच सर्व्हिस रोडला असलेल्या नाल्याजवळ (जिथे ७ फूट खोल खड्डा आहे) पॅराफिट वॉलचे काम सुरू होते. यावेळी गुत्तेदाराची एक काँक्रिट मिक्सर गाडी काल टाकलेल्या नव्या स्लॅबवरून गेली. कामाचा दर्जा इतका निकृष्ट होता की, या गाडीच्या वजनाने तो नवीन स्लॅब लगेचच तुटून कोसळला.
ड्रायव्हरचा पळ; नागरिकांकडून व्हिडीओ चित्रीकरण
स्लॅब कोसळल्याचे पाहताच स्थानिक नागरिकांनी संताप व्यक्त करत हे निकृष्ट दर्जाचे काम तात्काळ थांबवले. नागरिकांनी काँक्रिट मिक्सरच्या ड्रायव्हरला गाडी थांबवण्यास सांगितले. मात्र, ड्रायव्हरने नागरिकांचे न ऐकता गाडीसह तेथून पळ काढला. सुदैवाने, स्थानिक नागरिकांनी सजगता दाखवत गाडी पळून जात असतानाचे मोबाईल कॅमेऱ्यात व्हिडीओ चित्रीकरण केले आहे.
पुन्हा थातूरमातूर कामाचा घाट
ड्रायव्हर पळून गेल्यानंतर आता पुन्हा त्याच ठिकाणी कोसळलेला स्लॅब लपवण्यासाठी आणि निकृष्ट कामाचा आणखी एक ‘उत्कृष्ट नमुना’ सिद्ध करण्यासाठी गुत्तेदाराकडून पुन्हा थातूरमातूर काम सुरू करण्यात आले आहे. या संपूर्ण प्रकारामुळे नागरिकांमधून तीव्र संताप व्यक्त होत असून, संबंधित गुत्तेदारावर कठोर कारवाई करण्याची आणि कामाच्या दर्जाची चौकशी करण्याची मागणी जोर धरू लागली आहे.
