धाराशिव – अंमली पदार्थ विरोधी टास्क फोर्स (ANTF), छत्रपती संभाजीनगर विभागाने धाराशिव जिल्ह्यातील ढोकी येथे एक मोठी कारवाई करत अवैध गांजा आणि चरसची विक्री करणाऱ्या एकाला बेड्या ठोकल्या आहेत. या कारवाईत पोलिसांनी तब्बल ६९ लाख १९ हजार १९० रुपयांचा मुद्देमाल जप्त केला असून, आरोपीच्या दुमजली आलिशान बंगल्यात जुगाराचा अड्डा देखील उघडकीस आला आहे.
मिळालेल्या माहितीनुसार, १३ ऑगस्ट २०२६ रोजी सकाळी ७.२० वाजता एएनटीएफच्या पथकाला मिळालेल्या गुप्त माहितीच्या आधारे तेरणानगर, ढोकी येथे छापा टाकण्यात आला. यावेळी आरोपी बाप्पा शंकर पवार याच्या घराची झडती घेतली असता, घरात ठेवलेल्या गोण्यांमध्ये ५० किलो ३५८ ग्रॅम गांजा आणि १३१ ग्रॅम चरस आढळून आले. तसेच, आरोपीची अंगझडती घेतली असता २१ तोळे सोने आणि रोख रक्कम असा एकूण ६९,१९,१९० रुपयांचा मुद्देमाल हस्तगत करण्यात आला आहे.
आलिशान बंगल्यात चालवायचा पत्त्यांचा क्लब:
आरोपी बाप्पा पवार याचा कोट्यवधी रुपयांचा दुमजली आलिशान बंगला आहे. या कारवाईदरम्यान पोलिसांना असेही दिसून आले की, अंमली पदार्थांच्या साठ्याव्यतिरिक्त आरोपी त्याच्या घराच्या दुसऱ्या मजल्यावरील स्लॅबवर पत्त्यांचा क्लब (जुगार) चालवत होता. या ठिकाणी पोलिसांना जुगार खेळण्याचे बरेच साहित्यही मिळून आले आहे.
गुन्हा दाखल, एएनटीएफकडून तपास सुरू:
याप्रकरणी आरोपी बाप्पा शंकर पवार याच्याविरुद्ध ढोकी पोलीस ठाणे (जि. धाराशिव) येथे NDPS कायद्यानुसार गुन्हा दाखल करण्यात आला आहे. आरोपीने एवढ्या मोठ्या प्रमाणात गांजा आणि चरस कोठून आणला होता आणि तो कोणाला विक्री करत होता, याचा सखोल तपास आता ANTF कडून केला जात आहे.
सदरची धडक कारवाई अंमली पदार्थ विरोधी टास्क फोर्सचे पोलीस महानिरीक्षक श्रीमती ज्योतिप्रिया सिंह, पोलीस अधीक्षक श्री. अजीत टिके, DYSP साईनाथ ठोंबरे यांच्या मार्गदर्शनाखाली करण्यात आली. पोलीस निरीक्षक श्रीमती गीता बागवडे, पोलीस उपनिरीक्षक प्रदीप ठाकुर, स. पोलीस उपनिरीक्षक वाहेद मुल्ला, हनुमान पुरके यांच्यासह पोलीस अंमलदार शैला टेळे, सुरेश राऊत, नागेश केंद्रे, निलेश सरपाळे, कैलास गाडेकर, नितीन जाधव, रवींद्र साळवे, राहुल काळे, अतुल तुपे, हरीश मुंडे, ज्ञानेश्वर चव्हाण, ज्योती किर्तीकर, प्रियांका पवार आणि आम्रपाली सुर्यवंशी यांच्या पथकाने ही कारवाई यशस्वीपणे पार पाडली.
