ढोकी – धाराशिव तालुक्यातील हिंगळजवाडी येथे शेतातील गवत व झुडपे काढून टाकण्याच्या कारणावरून एका ७५ वर्षीय वृद्ध शेतकऱ्याला गैरकायद्याची मंडळी जमवून कुऱ्हाडीचा तुंबा, खोरे आणि लाथाबुक्क्यांनी बेदम मारहाण केल्याची धक्कादायक घटना घडली आहे. या हल्ल्यात वृद्ध गंभीर जखमी झाले असून, याप्रकरणी ढोकी पोलीस ठाण्यात एकाच कुटुंबातील ५ जणांविरुद्ध गंभीर कलमान्वये गुन्हा दाखल करण्यात आला आहे.
नेमकी घटना काय?
हिंगळजवाडी (ता. जि. धाराशिव) येथील रहिवासी सुरेश शंकर वाकुरे (वय ७५ वर्षे) हे ९ सप्टेंबर २०२६ रोजी दुपारी १२.४५ ते १.१५ वाजेच्या सुमारास आपल्या शेत गट नंबर १३९ मध्ये उपस्थित होते.
त्यावेळी शेतातील गवत व झुडपे काढून टाकण्याच्या कारणावरून गावातीलच अभिजीत आगतराव वाकुरे, अजिंक्य आगतराव वाकुरे, आगतराव सोपान वाकुरे, अनिल उत्तम वाकुरे आणि प्रसाद अजिंक्य वाकुरे (सर्व रा. हिंगळजवाडी) यांनी बेकायदेशीर जमाव जमवला. आरोपींनी सुरेश वाकुरे यांना अश्लील शिवीगाळ करत लाथाबुक्क्यांनी, खोऱ्याने तसेच कुऱ्हाडीच्या तुंब्याने बेदम मारहाण करून गंभीर जखमी केले. तसेच पुन्हा शेतात दिसल्यास जीवे ठार मारण्याची धमकी दिली.
ढोकी पोलिसांत ५ जणांवर गुन्हा नोंद
उपचार घेतल्यानंतर जखमी सुरेश वाकुरे यांनी ११ सप्टेंबर २०२६ रोजी ढोकी पोलीस ठाण्यात जाऊन फिर्याद दिली. त्यांच्या प्रथम खबरेवरून पोलिसांनी पाचही आरोपींविरुद्ध भारतीय न्याय संहिता (BNS) कलम ११८(२), ११५(२), ३५२, ३५१(२)(३), १८९(२), १९१(२), १९१(३) आणि १९० अन्वये गुन्हा नोंदवला आहे. या प्रकरणाचा पुढील तपास ढोकी पोलीस करत आहेत.
