पोलिसांनी दिलेल्या माहितीनुसार, अमित झेंडे आणि राणा झेंडे (दोघे रा. धाराशिव) अशी आरोपींची नावे आहेत. फिर्यादी दिलीप विठ्ठलराव काळे (वय ५२, रा. शिवली, ता. औसा, जि. लातूर) हे १६ सप्टेंबर २०२६ रोजी दुपारी ३.३० वाजल्यापासून धाराशिव बसस्थानकाजवळील रस्त्याच्या चौकात होते. यावेळी ते मद्यधुंद अवस्थेत असल्याचा फायदा घेत आरोपींनी त्यांना स्वतःच्या घरी नेल्याचे फिर्यादीत नमूद आहे.
त्यानंतर आरोपींनी त्यांना घरात सलग तीन दिवस डांबून ठेवून मारहाण केली. त्यांच्या मालकीच्या शेतीची माहिती काढून घेतली. संबंधित जमीन वडिलोपार्जित असतानाही आरोपींनी फिर्यादीला वेळोवेळी एकूण ९ लाख ७० हजार रुपये रोख दिल्याचे बॉण्ड पेपरवर नमूद केले.
याशिवाय, कोणतीही माहिती न देता वेगवेगळ्या कागदपत्रांवर सह्या करण्यास भाग पाडून फसवणूक केल्याचा आरोप आहे. फिर्यादीच्या मुलालाही शिवीगाळ करून धमकी दिल्याचे तक्रारीत म्हटले आहे.
या प्रकरणी दिलीप काळे यांनी ३ नोव्हेंबर २०२६ रोजी आनंदनगर पोलीस ठाण्यात फिर्याद दिली. त्यावरून अमित झेंडे आणि राणा झेंडे यांच्याविरुद्ध भारतीय न्याय संहिता कलम १२७(७), ११८(१), ३५२, ३५१(२), ३५१(३), ३१८(४), ३५१(४) आणि ३(५) अन्वये गुन्हा दाखल करण्यात आला आहे. या प्रकरणाचा पुढील तपास आनंदनगर पोलीस करीत आहेत.
