धाराशिव जिल्ह्यातील विधानसभा निवडणुकीचा माहोल तापलेला आहे. उमेदवारी अर्ज दाखल करण्यासाठी फक्त दोनच दिवस शिल्लक आहेत, आणि जिल्ह्यातील प्रत्येक पक्षाचा धडाका सुरु आहे. मात्र, ज्यांच्या नावावर ‘शिल्लक पक्ष’ असं बिरुद लावलं जातंय, त्या राष्ट्रवादी काँग्रेस (अजित पवार गट) पक्षाचे जिल्हाध्यक्ष महेंद्र काका धुरगुडे मात्र थोडे चिंतेत दिसत आहेत. कारण संपूर्ण जिल्ह्यात अजितदादा पवारांच्या गटाला एकही जागा मिळालेली नाही!
धाराशिव जिल्ह्यातील चार विधानसभा मतदारसंघांच्या जागांचे महायुतीच्या गठबंधनात वाटप केले गेले आहे. तुळजापूरचा मतदारसंघ भाजपकडे गेला, तर परंडा आणि उमरगा हे मतदारसंघ शिंदे गटाकडे सोपवले आहेत. आश्चर्याची गोष्ट म्हणजे, या तिन्ही जागांवर विद्यमान आमदारांना तिकीट देण्यात आले आहे, जणू हा जागा वाटपाचा कार्यक्रम त्यांच्या आधीच मांडून ठेवला होता!
हे बघून महेंद्र काकांच्या चेहऱ्यावर एक निराशेचा शिडकावा येतो. त्यांना वाटतं की, किमान धाराशिव मतदारसंघ तरी राष्ट्रवादीला द्यावा. तसंही, धाराशिव ही अजितदादांची सासुरवाडी आहे. मागील लोकसभा निवडणुकीत अजितदादांनी धाराशिवमध्ये धडाकेबाज रोड शो घेतला होता आणि त्यांचं प्रतिकूल नेतृत्व दाखवून भाजप आमदार राणा जगजितसिंह पाटील यांच्या पत्नी अर्चना पाटील यांना राष्ट्रवादीच्या उमेदवारीसाठी मैदानात उतरवलं. पण निकाल लागला तेव्हा धक्का बसला – ताई तब्बल तीन लाख मतांनी पराभूत झाल्या.
त्यामुळे आता धाराशिवचा विषय काढला की, दादांना जरा धडधडतंय. सासुरवाडीचं नातं आहे म्हटलं तरी धाराशिवच्या जागेपासून ते थोडं दूरच राहणं पसंत करतात. कारण आता हे जिल्हा देखील बारामतीसारखं राहिलेलं नाही, इथले लोकही दादांकडे लांबूनच नमस्कार करतात. “सासुरवाडी असली म्हणजे काय?” असं म्हणत अजितदादांनी धाराशिवची जागा बिनधास्तपणे शिंदे गटाला सोडून दिली आहे.
तरीही, महेंद्र काका धुरगुडे अजून हार मानायला तयार नाहीत. मुंबईत थेट अजितदादा आणि प्रदेश अध्यक्ष सुनील तटकरे यांच्या दरबारी हजेरी लावली. त्यांचं अजूनही तेच मागणं – “दादा, धाराशिवचा हा एक मतदारसंघ तरी आम्हाला द्या! संपूर्ण जिल्ह्यात आम्हाला काहीच मिळालं नाही, पण एक तरी जागा मिळावी ही आमची माफक अपेक्षा आहे.”
काकांचा हा आग्रह त्यांच्या राष्ट्रवादीला एक दिलासा देण्यासाठी आहे, पण अजितदादा मात्र आपलं विचारचक्र चालवत आहेत. धाराशिवचं नाव ऐकलं की त्यांना बारामतीचे लोक आठवतात, ज्यांना बाय बाय करणं केव्हाच योग्य वाटलं असावं. त्यामुळे अजितदादा, एकीकडे विचारमग्न आहेत, तर काका आशेने म्हणत आहेत, “अजितदादा, एक तरी जागा द्या कि हो!”
धाराशिवच्या राजकीय रंगमंचावर आता एकच प्रश्न आहे – महेंद्र काकांचा हा आर्त विनंतीनाद ऐकून अजितदादा काकांना जागा देतील की नाही?
