परंडा : परंडा तालुक्यातील सिरसाव वाकडी येथे मयत मुलीचा चेहरा पाहण्याच्या कारणावरून नातेवाईकांमध्ये झालेल्या वादातून जमावाने दोघांना बेदम मारहाण केल्याची घटना घडली आहे. या प्रकरणी केदार जाधव यांच्यासह अन्य दहा जणांवर परंडा पोलीस ठाण्यात गुन्हा दाखल करण्यात आला आहे.
नेमकी घटना काय?
पोलिसांनी दिलेल्या माहितीनुसार, ही घटना १ नोव्हेंबर २०२५ रोजी रात्री १०:३० च्या सुमारास सिरसाव वाकडी (ता. परंडा) येथे घडली. फिर्यादी श्याम प्रल्हाद चव्हाण (वय ३६, रा. सवतगाव, ता. माळशिरस, जि. सोलापूर) हे आपल्या नातेवाईकांकडे आले होते. यावेळी मयत मुलीचा चेहरा पाहण्यावरून नातेवाईकांमध्ये वाद झाला.
या वादाचे रूपांतर हाणामारीत झाले. आरोपी केदार जाधव (रा. सिरसाव वाकडी) आणि त्याच्यासोबत आलेल्या इतर १० जणांनी बेकायदेशीर जमाव जमवून श्याम चव्हाण यांना शिवीगाळ केली. तसेच, लाथाबुक्क्यांनी आणि काठीने मारहाण करून त्यांना जखमी केले. हा वाद सोडवण्यासाठी आलेले फिर्यादीचे मामाचा मुलगा मेघराज पवार यांनाही आरोपींनी काठीने मारहाण केली.
उशिरा गुन्हा दाखल
घटनेनंतर जखमींवर उपचार सुरू होते. या घटनेनंतर तब्बल १८ दिवसांनी, म्हणजे १९ नोव्हेंबर २०२५ रोजी फिर्यादी श्याम चव्हाण यांनी परंडा पोलीस ठाण्यात तक्रार दिली.
त्यानुसार पोलिसांनी केदार जाधव व इतर १० अनोळखी इसमांविरुद्ध भारतीय न्याय संहिता (B.N.S.) कलम ११८(१), ११५(२), ३५२, ३५१(२), १८९(२), १९१(२), १९१(३), १९० अन्वये गुन्हा दाखल केला आहे. पुढील तपास परंडा पोलीस करत आहेत.
