धाराशिव विधानसभा मतदारसंघातील आगामी निवडणुकीसाठी राजकीय रणसंग्राम तापलेला आहे. विविध पक्षांचे आणि अपक्ष उमेदवार मिळून एकूण १२ उमेदवार रिंगणात आहेत. यावेळी शिवसेना, महाराष्ट्र नवनिर्माण सेना, बहुजन समाज पक्ष, वंचित बहुजन आघाडी, भारतीय जनविकास आघाडी यासह अनेक पक्षांचे उमेदवार आणि चार अपक्ष उमेदवार मतदारांचा कौल मिळवण्यासाठी मैदानात उतरले आहेत.
धाराशिव मतदारसंघात शिवसेनेच्या दोन उमेदवारांनी आपली उमेदवारी दाखल केली आहे. शिवसेना उद्धव बाळासाहेब ठाकरे गटाच्या वतीने विद्यमान आमदार कैलास बाळासाहेब घाडगे पाटील यांनी तर शिवसेनेच्या शिंदे गटातर्फे अजित बप्पासाहेब पिंगळे यांच्यात कडवी झुंज रंगणार आहे. शिवसेनेच्या दोन गटांमधील ही निवडणूक मोठ्या संघर्षाची ठरणार आहे.
महाराष्ट्र नवनिर्माण सेनेचे (मनसे) देवदत्त भागवत मोरे हेही रिंगणात आहेत. मनसेने आपल्या विचारसरणीने मतदारांना आकर्षित करण्याचा प्रयत्न केला आहे, आणि मोरे यांनी मतदारसंघात आपली जुळवणी केली आहे.
बहुजन समाज पक्षाचे (बसपा) लहू रघुनाथ खुणे यांनीही आपल्या पक्षाचे प्रतिनिधित्व करत मतदारांमध्ये विश्वासार्हता मिळवण्यासाठी निवडणूक लढवण्याचा निर्धार केला आहे.
वंचित बहुजन आघाडीचे अ‍ॅड. प्रणित शामराव डिकले हे मतदारांच्या हक्कासाठी लढण्याचे वचन देत निवडणूक लढवणार आहेत. वंचित बहुजन आघाडीच्या विचारधारेशी असलेल्या मतदारांचा पाठिंबा मिळवणे हे त्यांचे मुख्य उद्दिष्ट आहे.
भारतीय जनविकास आघाडीचे डॉ. रमेश सुब्राव बनसोडे हेही मतदारांच्या सेवेसाठी आणि विकासकामांसाठी मैदानात उतरले आहेत. त्यांचा भर धाराशिवच्या प्रगतीवर राहणार असल्याचे त्यांनी सांगितले आहे.
टिपू सुलतान पार्टीचे उमेदवार सिराज ऊर्फ पापा फत्तरोहीन सय्यद हेही या निवडणुकीत आपले नशीब आजमावत आहेत. मतदारांना वेगळा पर्याय उपलब्ध करून देण्याचा त्यांचा प्रयत्न आहे.
राष्ट्रीय समाज पक्षाकडून श्रीहरी वसंत माळी यांनीही निवडणुकीत आपली उमेदवारी सादर केली आहे. त्यांच्या पक्षाची धोरणे आणि ग्रामीण विकासाचे मुद्दे यामुळे ते मतदारांमध्ये आपला प्रभाव निर्माण करू पाहत आहेत.
यावेळी चार अपक्ष उमेदवारांनीही धाराशिवच्या निवडणुकीत आपले नशीब आजमवण्याचा निर्णय घेतला आहे. अशोक अनंत कसबे, दत्ता मोहन तुपे, नितीन गजेंद्र काळे, आणि विक्रम रघु काळे हे अपक्ष उमेदवार म्हणून निवडणूक रिंगणात आहेत. अपक्ष उमेदवारांचीही लक्षणीय उपस्थिती असून, ते आपले स्वतंत्र विचार आणि योजना घेऊन मतदारांना आकर्षित करण्याचा प्रयत्न करत आहेत.
धाराशिव विधानसभा निवडणुकीतील उमेदवारांची लढत अत्यंत चुरशीची होण्याची शक्यता आहे. शिवसेनेच्या दोन गटांमधील स्पर्धा, मनसेचा संघर्ष, आणि विविध पक्षांचे उमेदवार यामुळे मतदारांचा कौल कोणाच्या बाजूने जातो, याकडे सर्वांचे लक्ष लागलेले आहे. या निवडणुकीत स्थानिक विकास, रोजगार, शिक्षण, आणि सामाजिक न्यायाचे मुद्दे महत्त्वाचे ठरू शकतात.
धाराशिवमधील राजकीय वातावरण तापलेले आहे, आणि या निवडणुकीत कोण बाजी मारणार, हे पाहणे उत्सुकतेचे ठरणार आहे. मतदारांचा कौल येणाऱ्या काळात कोणाला यशस्वी ठरवतो, याची सर्वांनाच प्रतीक्षा आहे.
धाराशिव मतदारसंघात एकूण बारा उमेदवार रिंगणात उतरले आहेत. मतदार राजा कुणाचे बारा वाजवणार ? हे २३ नोव्हेंबर रोजी कळणार आहे. मतदान २० नोव्हेंबर रोजी आहे.
