धाराशिव – विधानसभा निवडणुकीच्या रणधुमाळीचा बिगुल वाजला आहे, पण उमेदवारांचे डोळे अजूनही तिकीटाच्या लॉटरीवर खिळले आहेत. जिल्ह्यातील चार मतदारसंघांतून लढण्याची उमेदवारांची तयारी जणू क्रिकेटच्या अंतिम सामन्याप्रमाणे तणावपूर्ण झाली आहे, पण सध्या मैदानात ‘तिकीट मिळाले…मिळाले…मिळाले!’, ‘कापले…कापले…कापले!’ अशी चर्चा जोरात सुरू आहे.
महायुतीतल्या उमेदवारांनी धाराशिवचा गड सोडून उर्वरित तीन मतदारसंघांची फासेफेक सोडवली आहे. तर महाविकास आघाडीला अजूनही “कोणाच्या डोक्यावर गदा पडणार?” याचा विचार करत तुळजापूर, परंडा, आणि उमरग्यात तिढा अजून कायम ठेवला आहे. उमेदवारांनी मुंबईत तळ ठोकले आहेत, आणि तिकिटासाठी इतके तडजोडीच्या विचारात आहेत की, देव पाण्यात ठेवलाय की देवच पाण्यात बसलाय, हे अजूनही ठरत नाही.
धाराशिव जिल्ह्यातील राजकीय बाजारात सध्या उमेदवारांची तुंबळ गर्दी आहे. प्रत्येकाला वाटतंय, “या वेळेस तर आपणच आमदार होणार!” पण तिकीट मिळाल्यावरच सगळं ठरणार. काहींनी तर शर्टाच्या खिशात बऱ्याच वेळा हात घातलाय, पण तिकीट काही हाती लागेना! इतकं की देवही विचार करतोय, “हे राजकारण सोडून बघावं का?”
महायुतीचे काही भाग्यवान उमेदवार सध्या वाजतगाजत पुढे निघाले आहेत. बाकीचे मात्र तिकीटाच्या कन्फर्मेशनसाठी इतके डोळे लावून बसलेत की हॉटेलमध्ये चहा सुद्धा ३ वेळा रिचार्ज करावा लागतोय. ज्यांचं तिकीट अजूनही ‘वेटिंग लिस्ट’मध्ये आहे, ते दिवाळीत फटाके फुटल्यागत तणावात आहेत – नुसतं ठिणग्या पडतायत, पण फटाक्यांचा आवाज काही होत नाहीये!
दरम्यान, विरोधकांच्या महाविकास आघाडीची अवस्था तर ‘तीन पक्ष एकत्र, पण कोणाचा कसा निर्णय होणार?’ यावर गोंधळलेली आहे. तुळजापूर, परंडा, उमरग्यातल्या इच्छुक उमेदवारांचे चेहरे पाहून असं वाटतंय की, थेट राज्यभराचं ‘महाभारत’ इथंच लढलं जातंय. काँग्रेस, उद्धव गट आणि शरद पवार गटाच्या “कोण आपलं? कोण परकं?” याचा गोंधळ अजूनही मिटलेला नाही.
आता बच्चू कडू, राजू शेट्टी आणि संभाजीराजे यांची आघाडी, वंचित बहुजन आघाडी आणि राज ठाकरे यांच्या मनसेचं मैदानावर येणं म्हणजे ‘रेसच्या घोड्यांच्या शर्यतीत अचानक बैलांच्या गाड्यांचा समावेश’ असल्यासारखं वाटतंय. धुरळा उडणार हे नक्की!
आता सगळ्यांचं लक्ष २० नोव्हेंबरच्या मतदानाकडे आहे, पण त्याआधीच काहींच्या स्वप्नातली आमदारकी हातातून निसटणार हे नक्की! आणि शेवटी, ‘राजकारणात कोणतं तिकीट कुठे नेणार?’ हा सस्पेन्स कायम ठेवत, धाराशिवच्या राजकीय रंगभूमीवर आणखी काही रंग दाखवणार आहे.
“धाराशिवच्या ‘तिकिटं’ गाडीत कोण ‘फर्स्ट क्लास’, कोण ‘कटिंग’, आणि कोण थेट ‘बेरोजगार’ होणार?” हे पाहणं रंजक असणार आहे!
तर आता, कोणाच्या हातात जाणार सोनेरी तिकीट आणि कोणाच्या हातात जाणार कटिंगचा तुकडा? मतदारसंघात सस्पेन्स ताणला गेला आहे. मतदानाचं अखेरचं चेंडू पडायच्या आत अनेकांच्या स्वप्नातली ‘आमदारकी’ फसवी सावली ठरणार !
या सगळ्यात, तिकीट मिळेल, अशी स्वप्ने पाहणारे लाखो रुपयांची उधळण करून मतदारसंघावर फुले उधळतायत, पण तिकिटाचा गोल्डन चान्स मिळाला नाही तर “हाय रे खर्च…हाय रे स्वप्ने!” असं म्हणत हाती आलेल्या फुलांचं काट्यात रूपांतर होणार, हे नक्की.
– बोरूबहाद्दर
