धाराशिव: राजकारणात कुणी कुणाचा कायमचा शत्रू नसतो असं म्हणतात, पण स्थानिक पातळीवरची खुन्नस आणि पराभवाची खदखद किती भयंकर असू शकते, याचा एक उत्तम नमुना धाराशिवमध्ये पाहायला मिळाला आहे. शहरात लागलेले ‘एक कोटीचा गद्दार’ आणि ‘दाढीवाला बोका’ असे उल्लेख असलेले ते वादग्रस्त बॅनर कोणी कट्टर शिवसैनिकाने लावले नसून, चक्क भाजपच्या एका स्थानिक पदाधिकाऱ्याने लावले असल्याची ‘इन्साईड स्टोरी’ आता समोर आली आहे.
पराभवाचा राग आणि रात्रीतून ‘बॅनर-बॉम्ब’
मिळालेल्या खात्रीलायक माहितीनुसार, समतानगरमधील हे होर्डिंग शिवसेना ठाकरे गटातून शिंदे गटात प्रवेश केलेले नगरसेवक नाना घाडगे यांना टार्गेट करून लावण्यात आले आहे. विशेष म्हणजे, ज्या भाजप पदाधिकाऱ्याने हे बॅनर लावले आहे, त्याला सहा महिन्यापूर्वी झालेल्या निवडणुकीत याच नाना घाडगे यांनी आस्मान दाखवत पराभूत केले होते. निवडणुकीत खावी लागलेली तीच धूळ आणि पराभवाचा तोच राग मनात ठेवून, या पदाधिकाऱ्याने ठाकरे गटाच्या नावाखाली आपली वैयक्तिक भडास या होर्डिंगच्या माध्यमातून काढली आहे.
“तुमच्याकडे आले की खुद्दार, आमच्याकडे आले की गद्दार?”
हा सगळा प्रकार उघडकीस आल्यानंतर आता शिवसेना शिंदे गटाचे कार्यकर्ते चांगलेच आक्रमक झाले आहेत. मित्रपक्ष असलेल्या भाजपच्याच पदाधिकाऱ्याने असा ‘गेम’ केल्याने शिंदे गटाने थेट भाजपलाच आरसा दाखवला आहे. “वा रे तुमचा न्याय! एखादा नेता तुमच्या पक्षात (भाजपमध्ये) आला, वाशिंग मशीनमध्ये धुतला गेला की तो एकदम ‘खुद्दार’ आणि निष्ठावान होतो. पण तोच नेता जर शिवसेनेच्या शिंदे गटात आला, तर रातोरात ‘गद्दार’ कसा काय ठरतो?” असा बोचरा सवाल शिंदे गटाच्या कार्यकर्त्यांनी विचारला आहे.
कळंबचे १० नगरसेवक फोडताना किती ‘खोके’ मोजले?
शिंदे गटाचा संताप एवढ्यावरच थांबलेला नाही. ‘१ खोका, मतदाराला धोका’ या आरोपाचा समाचार घेताना त्यांनी थेट भाजपच्या वर्मावरच बोट ठेवले आहे. शिंदे गटाने सवाल केला आहे की, “आम्हाला खोक्यांवरून हिणवताय, मग कळंब नगरपरिषदेमधील तब्बल दहा (१०) नगरसेवक जेव्हा भाजपने फोडले होते, तेव्हा त्यांना किती खोके मोजले होते? तिथे काय सगळा व्यवहार फुकटात झाला होता का? तो कोणता प्रामाणिकपणा होता?”
थोडक्यात काय… एकंदरीतच, धाराशिवच्या राजकारणात सध्या ‘बॅनर एकाचे, राग दुसऱ्याचा आणि बदनामी तिसऱ्याचीच’ असा भन्नाट खेळ रंगला आहे. वैयक्तिक आकसापोटी लावलेल्या या बॅनरमुळे आता स्थानिक पातळीवर महायुतीतच ठिणगी पडली असून, आगामी काळात या ‘बॅनर-बदला’ नाट्याचा अंक कसा पुढे जातो, हे पाहणे रंजक ठरणार आहे!
