धाराशिव: धाराशिव नगरपालिकेतील शिवसेना उद्धव बाळासाहेब ठाकरे पक्षाच्या सातपैकी चार नगरसेवकांनी नुकताच शिंदे गटात प्रवेश केल्याने शहरातील राजकीय वातावरण चांगलेच तापले आहे. या घडामोडीवर ठाकरे गटाचे आमदार कैलास पाटील आणि जिल्हा प्रवक्ते तानाजी जाधवर यांनी आक्रमक भूमिका घेतली असून, पक्षांतर करणाऱ्या नगरसेवकांना अपात्र ठरवण्यासाठी न्यायालयात दाद मागणार असल्याचा इशारा दिला आहे.
पक्ष आणि मतदारांशी गद्दारी: तानाजी जाधवर
ठाकरे पक्षाच्या चिन्हावर निवडून आलेल्या या चार नगरसेवकांनी केवळ पक्षाशीच नव्हे, तर ज्या मतदारांनी त्यांना निवडून दिले त्यांच्याशीही गद्दारी केली आहे, असा आरोप जिल्हा प्रवक्ते तानाजी जाधवर यांनी केला. अशा नगरसेवकांना योग्य तो धडा शिकवला जाईल आणि त्यांचे पद रद्द व्हावे यासाठी कायदेशीर मार्गाने लढा दिला जाईल, असे त्यांनी स्पष्ट केले.
निष्ठेबद्दल अभिमान: आमदार कैलास पाटील
कोणत्याही प्रलोभनाला बळी न पडता पक्षाशी एकनिष्ठ राहिलेल्या उर्वरित सहकाऱ्यांचे कौतुक करताना आमदार कैलास पाटील म्हणाले:
-
“खोके किंवा कोणत्याही अमिषाला बळी न पडता रवी वाघमारे आणि राज निकम यांनी पक्षाशी इमान राखले आहे.”
-
अशा निष्ठावंत पदाधिकाऱ्यांचा आणि कार्यकर्त्यांचा पक्षाला सार्थ अभिमान आहे.
नगरसेवकांच्या या बंडखोरीनंतर ठाकरे गटाने थेट न्यायालयीन लढ्याची तयारी सुरू केल्याने धाराशिव पालिकेतील सत्तासंघर्ष आता कायदेशीर वळण घेण्याची शक्यता आहे.
