धाराशिव: हॉटेलमधील वादातून गोळीबार आणि जीवघेणा हल्ला: दोघा आरोपींना १० वर्षे सक्तमजुरी

धाराशिव: जेवणाच्या कारणावरून हॉटेल चालकाशी वाद घालून पिस्तुलातून गोळीबार करणे आणि चाकूने जीवघेणा हल्ला केल्याप्रकरणी धाराशिव जिल्हा व सत्र न्यायालयाने दोन आरोपींना १० वर्षे सक्तमजुरी आणि प्रत्येकी ४०,००० रुपये दंडाची शिक्षा सुनावली आहे. हा निकाल अतिरिक्त जिल्हा सत्र न्यायाधीश श्रीमती टी. जी. मिटकरी यांनी २८ जानेवारी २०२६ रोजी दिला.

नेमकी घटना काय?

ही घटना ३ फेब्रुवारी २०२१ रोजी दुपारी १२ ते १ च्या दरम्यान औसा-तुळजापूर रोडवरील मौजे भंडारवाडी शिवारातील ‘हॉटेल रिलॅक्स’ येथे घडली होती. आरोपी अर्जुन नागनाथ बडवणे, अभिषेक उध्दव विश्वकर्मा आणि इतर तीन साथीदार हॉटेलमध्ये आले होते. जेवणाच्या व्यवस्थेवरून आरोपींनी वाद घातला. यावेळी आरोपी अर्जुन बडवणे याने त्याच्याजवळील गावठी पिस्तुलातून एक गोळी जमिनीवर झाडली आणि हॉटेल मालक (फिर्यादी) अविनाश मोरे यांना शिवीगाळ केली. त्याचवेळी दुसरा आरोपी अभिषेक विश्वकर्मा याने फिर्यादीवर चाकूने हल्ला करण्याचा प्रयत्न केला.

हा गोंधळ ऐकून हॉटेलच्या वरच्या खोलीत आराम करत असलेले फिर्यादीचे वडील बाळासाहेब दामोदर मोरे खाली आले. ते आरोपींना समजावून सांगत असताना, अर्जुन बडवणे याने त्यांच्यावर पिस्तुलाने गोळी झाडली. ही गोळी बाळासाहेब यांच्या डाव्या बाजूला लागून शरीरात अडकली. यानंतर लोकांनी अभिषेकला पकडून ठेवले, मात्र अर्जुन आणि इतर साथीदार कारमधून पळून गेले. गंभीर जखमी बाळासाहेब मोरे यांच्यावर लातूर आणि पुणे येथे उपचार करून शस्त्रक्रियेद्वारे गोळी काढण्यात आली.

या घटनेची फिर्याद बेंबळी पोलीस ठाण्यात दिली गेल्यानंतर सहायक पोलीस निरीक्षक एम. जी. शेंडगे यांनी तपास केला. पोलिसांनी घटनास्थळावरून काडतूस, चाकू, रक्ताचे नमुने आणि सीसीटीव्ही फुटेज जप्त केले. विशेष म्हणजे, पळून गेलेला आरोपी अर्जुन बडवणे याने गंगाखेड पोलीस ठाण्याच्या हद्दीत दुसरा गुन्हा केला असताना त्याच्याकडून हे गावठी पिस्तूल जप्त करण्यात आले, जे या खटल्यात महत्त्वाचा पुरावा ठरले.

 या खटल्यात सरकार पक्षातर्फे जिल्हा सरकारी वकील महेंद्र बी. देशमुख आणि अतिरिक्त शासकीय अभियोक्ता एस. एस. सूर्यवंशी यांनी काम पाहिले. न्यायालयात एकूण १५ साक्षीदारांची साक्ष नोंदवण्यात आली.

सरकारी पक्षाचा युक्तिवाद आणि पुरावे ग्राह्य धरून न्यायाधीश श्रीमती टी. जी. मिटकरी यांनी आरोपी अर्जुन नागनाथ बडवणे आणि अभिषेक उध्दव विश्वकर्मा यांना दोषी ठरवले.

• भारतीय दंड विधान कलम ३०७ (खुनाचा प्रयत्न): १० वर्षे सक्तमजुरी आणि २०,००० रुपये दंड.

• शस्त्र अधिनियम (Arms Act): ७ वर्षे सक्तमजुरी आणि २०,००० रुपये दंड.

अशी एकूण १० वर्षे सक्तमजुरी व प्रत्येकी ४०,००० रुपये दंडाची शिक्षा सुनावण्यात आली आहे. या प्रकरणात कोर्ट पैरवी म्हणून पोलीस अंमलदार आशिष नागमोडे यांनी काम पाहिले.