धाराशिव: शहरातील आयुर्वेदिक कॉलनी परिसरात एका बंद घराचे कुलूप तोडून अज्ञात चोरट्यांनी सोन्या-चांदीचे दागिने आणि रोख रक्कम असा एकूण ५५,२०० रुपयांचा मुद्देमाल चोरून नेल्याची घटना उघडकीस आली आहे. ही घटना १६ ते १७ जून दरम्यान घडली असून, याप्रकरणी धाराशिव शहर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी अनिल दत्तात्रय काळे (वय ३०, रा. आयुर्वेदिक कॉलनी, धाराशिव) यांचे घर १६ जून रोजी सायंकाळी पावणेसहा ते १७ जून रोजी सकाळी साडेआठ वाजेपर्यंत बंद होते. याच कालावधीचा फायदा घेत अज्ञात चोरट्याने त्यांच्या घराचे कुलूप तोडून आतमध्ये प्रवेश केला.
चोरट्याने घरातील कपाटात ठेवलेले सोन्या-चांदीचे दागिने आणि १०,००० रुपयांची रोख रक्कम असा एकूण ५५,२०० रुपयांचा ऐवज चोरून नेला. घरात चोरी झाल्याचे लक्षात आल्यानंतर अनिल काळे यांनी गुरुवारी, दि. १९ जून २०२५ रोजी धाराशिव शहर पोलीस ठाण्यात फिर्याद दिली.
त्यांच्या तक्रारीवरून पोलिसांनी अज्ञात आरोपीविरोधात भारतीय न्याय संहिता (भा.न्या.सं.) कलम ३३१(१) आणि ३०५(अ) अन्वये गुन्हा नोंदवला आहे. पोलीस आरोपीचा शोध घेत असून, पुढील तपास सुरू आहे.
