ऑनलाईन गेमिंग फसवणूक रॅकेटचा पर्दाफाश, धाराशिव सायबर पोलिसांकडून पाच जणांना अटक

धाराशिव : जास्त परताव्याचे आमिष दाखवून ऑनलाईन गेमिंगद्वारे आर्थिक फसवणूक करणाऱ्या टोळीला अटक करण्यात धाराशिव सायबर पोलिसांना यश आले आहे.  बीडीजी गेम, दमन गेम आणि टी.सी. गेम यांसारख्या ऑनलाईन जुगार रॅकेटच्या माध्यमातून ही फसवणूक केली जात होती. 

सायबर पोलिसांना मिळालेल्या गोपनीय माहितीच्या आधारे, कळंब तालुक्यातील तडवळे गावात छापा टाकण्यात आला.  यावेळी, श्री. उत्तरेश्वर दामोधर इटकर (वय ४५, रा. सोनेसांगवी, ता. केज, जि. बीड) आणि श्री. अस्लम दस्तगीर तांबोळी (वय ३२, रा. शेळका धानोरा, ता. कळंब, जि. धाराशिव) यांना रंगेहाथ पकडण्यात आले. हे दोघे व्हॉट्सअॅपद्वारे लोकांना गेमिंग लिंक्स पाठवून, कमी पैशात जास्त परताव्याचे आमिष दाखवून ऑनलाईन जुगार खेळवत होते. 

तपासात मोठे रॅकेट उघड

अटक केलेल्या आरोपींच्या चौकशीत आणि त्यांच्या व्हॉट्सअॅप चॅटच्या तपासणीत या रॅकेटमागे आणखी काही जण असल्याचे उघड झाले.  आरोपींनी दिलेल्या माहितीनुसार, त्यांना गेमचे लॉगिन आयडी आणि पासवर्ड पुरवणारे इतर तीन आरोपी आहेत:

• सुरज घाडगे (रा. सातेफळ, ता. केज, जि. बीड) 
• नामदेव कांबळे (रा. अंबेजोगाई, जि. बीड)
• एम.डी. पाटील (रा. नांदेड) 
• या पाचही आरोपींनी संगनमत करून शासनाने बंदी घातलेल्या ऑनलाईन गेम्सच्या लिंक्स व्हॉट्सअॅपवर पाठवून अनेकांची आर्थिक फसवणूक केल्याचे निष्पन्न झाले आहे.

कायदेशीर कारवाई

या प्रकरणी सायबर पोलीस ठाण्यात गुन्हा नोंदवण्यात आला असून, पाचही आरोपींना अटक करण्यात आली आहे. त्यांच्यावर भारतीय दंड विधान संहिता, माहिती तंत्रज्ञान कायदा आणि महाराष्ट्र जुगार प्रतिबंधक कायद्याच्या विविध कलमांनुसार कारवाई करण्यात आली आहे.  या प्रकरणाचा पुढील तपास पोलीस निरीक्षक  ए. एच. चोरमले करत आहेत. 

सदरची कारवाई पोलीस अधीक्षक श्रीमती रितू खोखर आणि अप्पर पोलीस अधीक्षक श्रीमती शफकत आमना यांच्या मार्गदर्शनाखाली पोलीस निरीक्षक चोरमले, सहाय्यक पोलीस निरीक्षक कासुळे आणि त्यांच्या पथकाने यशस्वीरीत्या पार पाडली. 

सायबर पोलिसांचे नागरिकांना आवाहन

सायबर पोलिसांनी नागरिकांना आवाहन केले आहे की, कोणत्याही अनोळखी क्रमांकावरून आलेल्या मेसेज, लिंक किंवा फोनवर विश्वास ठेवू नये. बँक खात्याची माहिती, ओटीपी शेअर करू नये किंवा अज्ञात लिंकवर क्लिक किंवा क्यूआर कोड स्कॅन करू नये. कोणताही सायबर गुन्हा घडल्यास तात्काळ हेल्पलाइन क्रमांक 1930 वर संपर्क साधावा किंवा www.cybercrime.gov.in या पोर्टलवर तक्रार नोंदवावी, असे आवाहन करण्यात आले आहे.