धाराशिवच्या राजकारणात सध्या जो ‘सस्पेन्स आणि थ्रिलर’ सुरू आहे, त्यापुढे बॉलिवूडचे पिक्चरही फिके पडतील! साहेबांच्या (राणा पाटील) आणि भावी खासदारांच्या (मल्हार पाटील) ‘ऑपरेशन लोटस’चा फुगा पुण्याच्या अलीकडेच असा काही फुटलाय, की आता कमळाच्या पाकळ्या गोळा करण्याची वेळ आली आहे. आणि इकडे ‘कमळ’ कोमेजले असतानाच, तिकडे खासदार ओमराजे निंबाळकर यांच्या ‘ऑपरेशन टायगर’ने थेट ठाण्यातून डरकाळी फोडली आहे!
पुण्याच्या अलीकडचा तो ‘राडा’ अन् गाडीचा यू-टर्न!
झाले असे की, धाराशिव नगरपालिकेतील ठाकरे गटाचे ७ पैकी ४ नगरसेवक भाजपच्या गळाला लागले होते (पाचवा नंतर मागून जाणार होता). या ‘ऑपरेशन लोटस’साठी साहेब आणि मल्हार पाटलांचा अतिशय गुप्त आणि तगडी फिल्डिंग लावली होती. या नगरसेवकांना मुंबईला नेण्यासाठी थेट भाजपचे उपनगराध्यक्ष अक्षय ढोबळे यांची ‘आलिशान गाडी’ दिमतीला देण्यात आली.
गाडी सुसाट वेगाने मुंबईच्या दिशेने निघाली. पण पुण्याच्या अलीकडे एका हॉटेलवर गाडी थांबली आणि पिक्चरमध्ये अचानक भयंकर ट्विस्ट आला! हॉटेलवर या नगरसेवकांमध्ये अचानक कोणत्यातरी कारणावरून (कदाचित ‘खोक्यांच्या’ वाटणीवरून?) जोरदार हमरीतुमरी आणि राडा सुरू झाला.
इकडे यांचा राडा सुरू असतानाच, मागून पाळतीवर असलेल्या ठाकरे गट आणि शिवसेना शिंदे गटाच्या कार्यकर्त्यांनी थेट हॉटेलवर ‘धाड’ टाकली! त्यांनी या नगरसेवकांना अक्षरशः उचलले, गाडीत कोंबले आणि मुंबईचा रस्ता सोडून थेट धाराशिवला परत आणले! अक्षय ढोबळेंची आलिशान गाडी आणि साहेबांचे ‘ऑपरेशन लोटस’ पुण्यातूनच ‘बॅक टू पॅव्हेलियन’ झाले!
‘भावी खासदारां’चा पारा सटकला; ठेकेदाराची काढली पिसे!
पुण्यातून नगरसेवक ‘हायजॅक’ झाल्याची बातमी जेव्हा धाराशिवला पोहोचली, तेव्हा ‘भावी खासदार’ मल्हार पाटील यांचा संतापाने अक्षरशः भडका उडाला!
आपल्याच उपनगराध्यक्षाच्या गाडीतून नगरसेवक पळवले जातात, हे त्यांच्या जिव्हारी लागले. ज्या ‘मॅनेजरवर’ (नेत्यावर) या नगरसेवकांना सुखरूप मुंबईला पोहोचवण्याची जबाबदारी सोपवली होती, त्याला मल्हार पाटलांचा फोनवरूनच इतके भयंकर ‘हासडले’ की विचारू नका! “एवढं एक काम धड करता येत नाही का?” अशा शब्दांत झाप-झाप झापल्याची आणि त्या नेत्याची पार पिसे काढल्याची चर्चा आता संपूर्ण धाराशिवमध्ये चवीने चघळली जात आहे.
कमळ कोमेजले… आता ‘ऑपरेशन टायगर’ची डरकाळी!
इकडे साहेबांचे ‘ऑपरेशन लोटस’ फसल्याची संधी साधत, तिकडे खासदार ओमराजे निंबाळकर यांनी आपली ‘ऑपरेशन टायगर’ची फिल्डिंग टाईट केली. ओमराजेंनी असा काही फासा टाकला की, जे नगरसेवक भाजपमध्ये जाणार होते, त्यांचे थेट ‘ब्रेनवॉश’ करून त्यांना शिंदे गटाच्या वाटेवर आणून ठेवले!
खात्रीलायक वृत्तानुसार, आता ठाकरे गटाचे एकूण ५ नगरसेवक (जे कालपर्यंत भाजपच्या वाटेवर होते) ते आता थेट शिवसेना शिंदे गटात प्रवेश करणार आहेत!
४ नगरसेवक ठाण्यात दाखल; फत्ते होणार का?
सर्वात मोठी ब्रेकिंग म्हणजे, या पाचपैकी ४ नगरसेवक अत्यंत गुप्तपणे ‘ठाणे’ शहरात सुरक्षित दाखल झाले आहेत. (यावेळी त्यांना पुण्यात हॉटेलवर थांबण्याची चूक केली नाहीये!) उर्वरित एक जण लवकरच मागून जॉईन होणार आहे. हे सर्वजण उपमुख्यमंत्री एकनाथ शिंदे यांच्या हस्ते अधिकृतपणे शिंदे गटात प्रवेश करणार असल्याची पक्की खबर आहे.
आता संपूर्ण धाराशिवकरांचे लक्ष एकाच गोष्टीकडे लागले आहे— साहेबांचे ‘ऑपरेशन लोटस’ तर फोल ठरले, पण आता ओमराजेंचे हे ‘ऑपरेशन टायगर’ खरंच फत्ते होणार का? की ठाण्यातही एखादा नवा ‘डॉन’ एन्ट्री मारून नवा राडा करणार? धाराशिवच्या या राजकीय महाभारताचा पुढचा अंक अतिशय थरारक असणार आहे!
