धाराशिव – धाराशिव शहरापासून जवळच असलेल्या सारोळा गावाजवळ आज दुपारी एका एसटी बसचा भीषण अपघात झाला. कोंडहुन धाराशिवकडे येत असलेल्या या बसचा स्टेरिंग रॉड अचानक तुटल्याने चालकाचा बसवरील ताबा सुटला आणि बस रस्त्याच्या कडेला असलेल्या एका झाडावर जाऊन आदळली. या अपघातात बसमधील तीन प्रवासी जखमी झाले आहेत.
अपघातग्रस्त बसचा क्रमांक एमएच ११, बीएल ९३५८ असा आहे. अपघातानंतर घटनास्थळी एकच खळबळ उडाली. स्थानिक नागरिकांनी तातडीने मदतकार्याला सुरुवात केली आणि जखमींना बाहेर काढले. जखमी झालेल्या प्रवाशांना तातडीने धाराशिवच्या जिल्हा शासकीय रुग्णालयात दाखल करण्यात आले असून त्यांच्यावर सध्या उपचार सुरू आहेत. सुदैवाने या अपघातात कोणतीही जीवितहानी झालेली नाही.
अपघाताचे वृत्त समजताच पोलीस घटनास्थळी दाखल झाले आणि पंचनामा केला. तसेच वाहतूक सुरळीत करण्यासाठी तातडीने पावले उचलली. बसचा स्टेरिंग रॉड तुटण्याचे नेमके कारण अद्याप समजू शकलेले नाही. मात्र, ही घटना एसटी बसेच्या देखभालीबाबत गंभीर प्रश्न उपस्थित करते. प्रवाशांच्या सुरक्षेच्या दृष्टीने एसटी प्रशासनाने या घटनेची सखोल चौकशी करून दोषींवर कारवाई करावी, अशी मागणी होत आहे.
दरम्यान, जखमी झालेल्या प्रवाशांच्या नातेवाईकांनी रुग्णालयात धाव घेतली असून त्यांच्या प्रकृतीबाबत सातत्याने विचारणा करत आहेत.
अपघातामुळे पुन्हा एकदा एसटी बसेच्या सुरक्षिततेबाबत प्रश्नचिन्ह
या घटनेमुळे पुन्हा एकदा एसटी बसेच्या सुरक्षिततेबाबत प्रश्नचिन्ह निर्माण झाले आहे. एसटी बसेच्या देखभालीकडे दुर्लक्ष होत असल्याच्या तक्रारी वारंवार समोर येत असतात. अशा घटनांमुळे प्रवाशांमध्ये भीतीचे वातावरण निर्माण होते. त्यामुळे एसटी प्रशासनाने तातडीने यावर ठोस उपाययोजना करणे गरजेचे आहे.
हे नक्की वाचा
