नळदुर्ग पोलीस ठाण्याच्या हद्दीतील एका गावात १३ वर्षे १ महिन्यांच्या अल्पवयीन मुलीचा बालविवाह लावून दिल्याचा धक्कादायक प्रकार समोर आला आहे. बालविवाहानंतर संबंधित तरुणाने तिच्यावर लैंगिक अत्याचार केल्याने ती गर्भवती राहिली आणि तिने एका मुलाला जन्म दिल्याची माहिती पोलिसांनी दिली आहे.
पोलिसांनी दिलेल्या माहितीनुसार, २०२४ पासून आतापर्यंत संबंधित अल्पवयीन मुलगी बालवयात असतानाच आरोपींनी संगनमत करून तिचा एका तरुणासोबत बालविवाह लावून दिला. त्यानंतर संबंधित तरुणाने तिच्यावर लैंगिक अत्याचार केल्याचे पीडितेने दिलेल्या फिर्यादीत नमूद केले आहे.
या अत्याचारामुळे पीडित मुलगी गर्भवती राहिली आणि तिला एका मुलाला जन्म झाला. पीडितेने १४ ऑगस्ट २०२६ रोजी नळदुर्ग पोलीस ठाण्यात दिलेल्या फिर्यादीनंतर हा प्रकार उघडकीस आला.
या प्रकरणी पोलिसांनी भारतीय न्याय संहितेच्या कलम ६४(२)(एम), ६५(१), बालविवाह प्रतिबंध अधिनियम २००६ मधील कलम ९ व १० तसेच बालकांचे लैंगिक अपराधांपासून संरक्षण (POCSO) कायद्यातील कलम ४, ५(जे)(२) आणि ६ अन्वये गुन्हा दाखल केला आहे.
अल्पवयीन पीडितेची ओळख गोपनीय ठेवण्यात आली असून, प्रकरणाचा पुढील तपास नळदुर्ग पोलीस करीत आहेत.
