परंडा: वीस तोळे सोने अर्ध्या किमतीत देण्याचे आमिष दाखवून एका ६८ वर्षीय वृद्धाची सात लाख रुपये आणि पत्नीच्या गळ्यातील मंगळसूत्र असा लाखो रुपयांचा ऐवज लुटून फसवणूक केल्याची धक्कादायक घटना देवळाली-आरसोली रोडवर घडली आहे. याप्रकरणी परंडा पोलीस ठाण्यात दोघांची नावे आणि अन्य दोन अज्ञात अशा एकूण चार जणांवर गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, जाफराबाद (जि. जालना) येथील भोकरदन रोड परिसरात राहणारे भिकाजी वामनराव लोखंडे (वय ६८) यांना आरोपींनी २० तोळे सोने अर्ध्या भावात देण्याचे आमिष दाखवले होते. या आमिषाला बळी पडून लोखंडे हे शुक्रवार, १ मे रोजी सकाळी ९ वाजेच्या सुमारास देवळाली-आरसोली रोडवर आले होते.
याठिकाणी आरोपी काजल काळे, हमराज काळे आणि त्यांचे इतर दोन साथीदार तिथे आले. आरोपींनी ठरल्याप्रमाणे लोखंडे यांच्याकडून तब्बल सात लाख रुपये रोख घेतले. तसेच, पाहण्याच्या बहाण्याने लोखंडे यांच्या पत्नीच्या गळ्यातील सोन्याचे मणी मंगळसूत्रही स्वतःकडे घेतले. मात्र, ठरलेले सोने न देता आणि पैसे व मंगळसूत्र परत न करता आरोपींनी त्यांची फसवणूक केली.
आपली मोठी फसवणूक झाल्याचे लक्षात आल्यानंतर भिकाजी लोखंडे यांनी तत्काळ परंडा पोलीस ठाण्यात धाव घेतली. त्यांनी दिलेल्या प्रथम खबरीवरून (FIR) काजल काळे, हमराज काळे व इतर दोन अज्ञात इसमांविरुद्ध भारतीय न्याय संहिता (BNS) कलम ३१८(४), ३(५) अन्वये परंडा पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास पोलीस करत आहेत.
नागरिकांनी अनोळखी व्यक्तींच्या कोणत्याही आमिषाला बळी पडून आर्थिक व्यवहार करू नयेत, असे आवाहन पोलिसांकडून करण्यात आले आहे.
