परंडा : परंडा शहरात कत्तलीसाठी केली जाणारी गोवंश जनावरांची बेकायदेशीर वाहतूक रोखण्यात परंडा पोलिसांना मोठे यश आले आहे. पोलिसांनी कुर्डुवाडी-धाराशिव मार्गावर कारवाई करत दोन पिकअप गाड्यांमधून २६ वासरांची सुटका केली. जनावरांना चारा-पाण्याची सोय न करता अत्यंत निर्दयतेने कोंबून नेले जात होते. या कारवाईत पोलिसांनी वाहनांसह एकूण ११ लाख ३० हजार रुपयांचा मुद्देमाल जप्त केला असून, दोघांविरोधात गुन्हा दाखल केला आहे.
ही कारवाई शुक्रवारी (दि. १३ जून) मध्यरात्री सव्वा एक वाजण्याच्या सुमारास परंडा शहरातील डी.एड. कॉलेजच्या पाठीमागे करण्यात आली. पोलिसांना मिळालेल्या गोपनीय माहितीच्या आधारे, त्यांनी सापळा रचून पिकअप क्र. एमएच १२ ए.एक्स. ६८८१ आणि एमएच ०७ पी ०२७३ या दोन गाड्या थांबवल्या. गाडीची तपासणी केली असता, त्यात कत्तलीच्या उद्देशाने २६ गोवंशीय वासरे निर्दयतेने भरलेली आढळून आली.
पोलिसांनी तात्काळ दोन्ही वाहने ताब्यात घेऊन आरोपी दिपक शिंदे (रा. टेभुर्णी, जि. पुणे) आणि गौस अब्बास कुरेशी (वय २७, रा. देवगाव रोड, परंडा) यांना अटक केली.
याप्रकरणी पोलिसांनी सरकारतर्फे फिर्याद देऊन दोन्ही आरोपींविरोधात महाराष्ट्र प्राणी संरक्षण अधिनियम, प्राण्यांना क्रूरतेने वागवण्यास प्रतिबंध अधिनियम आणि प्राण्याचे परिवहन अधिनियम यांसारख्या विविध कायद्यांतील कलमांनुसार गुन्हा नोंदवला आहे. या कारवाईमुळे अवैध प्राणी वाहतूक करणाऱ्यांचे धाबे दणाणले असून, परंडा पोलीस पुढील तपास करत आहेत.
