तुळजापूर: तुळजापूर तालुक्यातील सिंदफळ गावात गट क्रमांक १७६ च्या जमिनीच्या एनए लेआउट घोटाळ्याप्रकरणी मुख्य आरोपी अद्याप मोकाट असल्याने पोलीस यंत्रणेच्या कार्यपद्धतीवर प्रश्नचिन्ह निर्माण झाले आहे. धाराशिव आणि तुळजापूर तहसीलदारांनी एकाच सर्वे नंबरचा एनए लेआउट मंजूर केल्याचा धक्कादायक प्रकार समोर आला आहे.
या प्रकरणी ७३ प्लॉट्सची खरेदी ९ डिसेंबर २०२४ रोजी झाली होती. यानंतर तुळजापूर तहसीलदार अरविंद बोळंगे यांनी १६ जानेवारी २०२५ रोजी तुळजापूर पोलिस ठाण्यात फिर्याद दाखल केली. या फिर्यादीनुसार विक्रेता पवनजित कौर गिरवरसिंग सुखमणी (वय ५४, रा. औरंगाबाद) आणि खरेदीदार सतिश सोपानराव पैरणाळे (वय ५८, रा. पुणे) यांच्यावर भारतीय दंड विधानाच्या विविध कलमांखाली गुन्हा दाखल करण्यात आला आहे.
गुन्हा दाखल होऊन अनेक दिवस झाले तरी पोलिसांनी आरोपींना अटक केली नाही, याबाबत आश्चर्य व्यक्त केले जात आहे. आरोपींनी तुळजापूर आणि धाराशिव तहसील कार्यालयातील काही कर्मचारी आणि दलाल यांच्याशी संधान साधून बोगस कृषी जमीन अकृषी करून एनए लेआउट तयार केले आणि त्याची विक्री केली आहे. काळे कारनामे करणारे, हे कर्मचारी धाराशिव आणि तुळजापूर तहसील कार्यालयात अनेक घोटाळे केल्याची चर्चा आहे.पोलिसांनी आरोपींना लवकरात लवकर अटक करून या घोटाळ्याचा सखोल तपास करावा, अशी मागणी नागरिकांकडून होत आहे.
