तुळजापूर – तुळजापूर तालुक्यातील सिंदफळ शिवारात शेतातील विहिरीला मोटार सुरू करण्यासाठी गेलेल्या शेतकऱ्याचा स्टीलच्या रॉडने निर्घृण खून करण्यात आला. ही घटना ५ मार्च रोजी सायंकाळी घडली. या प्रकरणी तुळजापूर पोलिसांनी तीन जणांविरुद्ध खुनाचा गुन्हा दाखल केला आहे.
रक्ताच्या थारोळ्यात सापडला शेतकरी
मयत सत्तार यासीम इनामदार (वय ५७) हे पाच मार्च रोजी सायंकाळी आपल्या शेतातील विहिरीतील मोटार सुरू करण्यासाठी गेले होते. बराच वेळ होऊनही परत न आल्याने त्यांचा मुलगा सोहेल त्यांना पाहण्यासाठी शेतात गेला. तिथे त्यांना रक्ताच्या थारोळ्यात पडलेले पाहून तो हादरला. त्याच्या डोक्यावर स्टीलच्या रॉडने जबर मारहाण करण्यात आली होती.
कुटुंबीयांनी त्यांना तातडीने तुळजापूर येथील उपजिल्हा रुग्णालयात दाखल केले. मात्र, अधिक रक्तस्त्राव झाल्याने त्यांना पुढील उपचारासाठी सोलापूर येथे हलवण्यात आले. मात्र, डॉक्टरांनी त्यांना मृत घोषित केले.
घटनास्थळी मद्याच्या बाटल्या आणि सिगारेट
घटनास्थळी पोलिसांना दारूच्या बाटल्या, सिगारेटचे पाकिटे आणि कुरकुरेचे पॉकेट आढळून आले. तसेच आंब्याच्या झाडाखाली कैऱ्या आढळून आल्या. त्यामुळे या घटनेमागे नेमके कोणते कारण आहे, हे अद्याप स्पष्ट झालेले नाही. पोलिसांनी या प्रकरणाचा तपास सुरू केला आहे.
गावात दहशतीचे वातावरण; मुख्य आरोपी रेकॉर्डवरील गुन्हेगार
तुळजापूरचे उपविभागीय पोलीस अधिकारी डॉ. निलेश देशमुख, पोलीस निरीक्षक आण्णासाहेब मांजरे यांनी घटनास्थळी भेट देऊन तपास सुरू केला आहे. वसीम गफुर इनामदार (वय ३५, रा. सिंदफळ) यांच्या फिर्यादीवरून गणेश घाटशिळे आणि त्याच्या दोन साथीदारांविरुद्ध भारतीय दंड संहितेच्या कलम 103(1), 3(5) अंतर्गत गुन्हा दाखल करण्यात आला आहे.
गणेश घाटशिळे हा यापूर्वीही अनेक गुन्ह्यांमध्ये अडकलेला असून, काही दिवसांपूर्वीच पोलिसांनी त्याच्याकडून गांजा जप्त केला होता. तो सध्या जामिनावर बाहेर होता. आता त्याच्यावर खुनाचा गुन्हा दाखल झाल्याने गावात दहशतीचे वातावरण निर्माण झाले आहे.
या घटनेमागील नेमके कारण काय आहे, याचा तपास पोलीस निरीक्षक आण्णासाहेब मांजरे यांच्या मार्गदर्शनाखाली सुरू आहे.
News Update
