कळंब: दारू पिण्यासाठी पैसे देण्यास नकार दिल्याच्या रागातून एका तरुणावर तलवारीने हल्ला केल्याची धक्कादायक घटना कळंब शहरातील सोनार गल्लीत घडली. या हल्ल्यात फिर्यादी तरुण जखमी झाला असून, याप्रकरणी कळंब पोलीस ठाण्यात एकावर गुन्हा दाखल करण्यात आला आहे.
नेमकी घटना काय?
मिळालेल्या माहितीनुसार, ही घटना २७ जानेवारी २०२६ रोजी दुपारी १:५० वाजण्याच्या सुमारास घडली. कळंब शहरातील सोनार लाईन येथील भडंगे ज्वेलर्स समोरील कट्ट्यावर फिर्यादी सुजीत दीपकराव वेदपाठक (वय ३४, रा. सावित्रीबाई हायस्कूल जवळ, कळंब) हे थांबले होते.
त्यावेळी आरोपी संकेत सुनील करवलकर (रा. सोनार गल्ली, कळंब) याने सुजीत यांच्याकडे दारू पिण्यासाठी पैशांची मागणी केली. सुजीत यांनी पैसे देण्यास नकार दिला असता, आरोपीने त्यांना शिवीगाळ करत लाथाबुक्क्यांनी मारहाण केली. एवढ्यावरच न थांबता आरोपीने आपल्याकडील तलवारीने सुजीत यांच्यावर हल्ला करून त्यांना जखमी केले आणि जिवे मारण्याची धमकी दिली.
गुन्हा दाखल
या घटनेनंतर जखमी सुजीत वेदपाठक यांनी दिलेल्या फिर्यादीवरून कळंब पोलीस ठाण्यात आरोपी संकेत करवलकर याच्याविरुद्ध भारतीय न्याय संहिता (BNS) कलम ११८(१) (जखमी करणे), ११५(२), ३५१(२) (धमकी देणे) तसेच भारतीय हत्यार कायदा (Arms Act) कलम ४/२५ अन्वये गुन्हा दाखल करण्यात आला आहे. भर दिवसा घडलेल्या या प्रकारामुळे परिसरात खळबळ उडाली आहे.
