तुळजापूर: धाराशिवमधील एका नामांकित वकिलाच्या मालकीच्या सीएनजी स्टेशनवर दिवसभराचे कलेक्शन आणण्यासाठी गेलेल्या त्यांच्याच ड्रायव्हरला दारूच्या नशेत असलेल्या तिघांनी बेदम मारहाण केल्याची धक्कादायक घटना तुळजापूर येथे घडली आहे. या घटनेचे सीसीटीव्ही फुटेज उपलब्ध असूनही आणि आरोपी सराईत गुन्हेगार असतानाही, तुळजापूर पोलिसांनी केवळ अदखलपात्र गुन्ह्याची (N.C.R.) नोंद करत आरोपींना पाठीशी घालण्याचा प्रयत्न केल्याचा आरोप होत आहे. आरोपी हे तुळजापूरमधील एका राजकीय नेत्याचे नातेवाईक असल्याची माहिती समोर आली आहे.
नेमकी घटना काय?
-
कलेक्शनसाठी गेले असता मारहाण: फिर्यादी सचिन विलास पारसे (वय ३८, रा. दत्त नगर, तेरणा कॉलेज, धाराशिव) हे धाराशिवमधील एका नामांकित वकिलाच्या गाडीवर ड्रायव्हर म्हणून काम करतात. हा तुळजाभवानी सीएनजी पंप त्याच वकिलाच्या मालकीचा आहे. दिनांक १७ मे २०२६ रोजी रात्री १०:४० च्या सुमारास पारसे हे सीएनजी स्टेशनवर दिवसभराचे आर्थिक कलेक्शन जमा करण्यासाठी गेले होते.
-
दारुड्यांचा गोंधळ: त्याचवेळी दिनेश देशमुख (रा. ढेकरी), राहुल पवार आणि प्रणव भोसले (रा. तुळजापूर) हे तीन आरोपी तिथे आले. दारूच्या नशेत असलेल्या या आरोपींनी तिथे आपापसात संगनमत करून गडबड आणि गोंधळ घालण्यास सुरुवात केली.
-
सीसीटीव्हीत कैद झाली बेदम मारहाण: पारसे यांनी त्यांना वाहन बाजूला घेण्यास सांगितले. या किरकोळ कारणावरून चिडलेल्या सराईत आरोपींनी पारसे यांना शिवीगाळ करत लाथाबुक्क्यांनी बेदम मारहाण केली आणि जीवे मारण्याची धमकी दिली. या भयंकर मारहाणीचे सीसीटीव्ही फुटेजही उपलब्ध आहे.
पोलिसांच्या कार्यपद्धतीवर प्रश्नचिन्ह:
-
फिर्याद घेण्यास टाळाटाळ: आरोपी हे एका स्थानिक नेत्याचे नातेवाईक असल्याने तुळजापूर पोलिसांनी सुरुवातीला या प्रकरणी फिर्याद नोंदवून घेण्यास टाळाटाळ केली.
-
गंभीर गुन्ह्याऐवजी केवळ ‘एन.सी.’: सीसीटीव्ही पुरावे असताना आणि बेदम मारहाण झालेली असतानाही, पोलिसांनी अखेर २० मे २०२६ रोजी सायंकाळी ७:०० वाजता केवळ अदखलपात्र गुन्ह्याची (N.C. नोंद) केली.
-
कलम: याप्रकरणी भारतीय न्याय संहिता (BNS), २०२३ च्या कलम ११५(२), ३५२, ३५१(३), आणि ३(५) अंतर्गत एन.सी.आर. क्रमांक ५०२/२०२६ नुसार नोंद करण्यात आली आहे.
सराईत गुन्हेगारांकडून इतकी गंभीर मारहाण होऊनही पोलिसांनी एफआयआर (FIR) दाखल करण्याऐवजी केवळ एन.सी. का नोंदवली? असा सवाल आता उपस्थित केला जात आहे.
