तुळजापूर आणि तामलवाडी पोलिसांनी ड्रग्जच्या व्यसनाला रोखण्यासाठी आक्रमक मोहीम हाती घेतली असून, आतापर्यंत चार आरोपींना अटक करण्यात आली आहे. विशेष म्हणजे, एका माजी नगराध्यक्षालाही ताब्यात घेतल्याची चर्चा रंगली असली तरी, पोलिसांनी अद्याप अधिकृत दुजोरा दिलेला नाही.
तुळजापुरात पोलिसांचा आक्रमक पवित्रा असताना, परंड्यात मात्र संपूर्ण शांतता आहे. येथे एमडी ड्रग्जचा खुलेआम व्यवसाय सुरू असून, हे शहर तुळजापूरच्या तुलनेत दहा पट अधिक प्रमाणात या काळ्या धंद्याचे अड्डे झाले आहेत.
हॉटेलमध्ये कपबश्या धुणाऱ्या ‘हाजी मस्तान’ची परंड्यात बादशाही!
एकेकाळी हॉटेलमध्ये कपबश्या धुणारा एक तरुण आता ‘हाजी मस्तान’ बनण्याची स्वप्नं पाहतोय! ड्रग्जचा संपूर्ण धंदा याच्या इशाऱ्यावर चालतो, आणि जवळपास पाच हजार तरुण त्याच्या विळख्यात सापडले आहेत.
सर्वात धक्कादायक म्हणजे, एका बड्या राजकीय नेत्याच्या ‘संरक्षणा’मुळे हा मुख्य सूत्रधार आजवर पोलिसांच्या तावडीत सापडला नाही. मात्र, या नेत्याचे सध्या राजकीय वजन कमी झाल्याने, परंड्यातील हा ड्रग्ज पेडलर फरार झाला आहे.
परंडा पोलिसांचा संशयास्पद मौन!
तुळजापूर आणि तामलवाडी पोलिसांनी धडक कारवाई सुरू केली असताना, परंडा पोलिस मात्र गप्प का? या प्रश्नाचे उत्तर शोधण्याची गरज आहे. परंड्यात ड्रग्जच्या आहारी गेलेल्या पाच हजार तरुणांचे भवितव्य अंधारात जात असताना, पोलिसांनी डोळेझाक करणे गंभीर आहे.
आता पाहावे लागेल की, परंड्यातील हा ‘हाजी मस्तान’ लवकर गजाआड होतो की, राजकीय वरदहस्तामुळे आणखी काही काळ सुटतो?
