तुळजापूरात नवरात्र महोत्सवाच्या गर्दीत चोरांनी भक्तांच्या खिशात हात घालायला सुरुवात केली आहे. भाविकांची गर्दी आणि चोरीची संधी साधत चोरांचा सुळसुळाट झाला असताना, पोलिसांनी एक अफलातून कारनामा केला आहे.
दि. ९ ऑक्टोबरला, देवी दर्शनासाठी आलेल्या अहमदनगरचे दत्तात्रय जर्नाधन म्हसे यांचा ११,००० रुपयांचा मोबाईल चोरला गेला. स्थानिक गुन्हे शाखेच्या पोलिसांनी तपासात लागून बीडच्या किरण गुंजाळ नामक २४ वर्षीय युवकाला पकडला. चोर पकडला म्हणून खुशीत असलेल्या पोलिसांनी एक ग्रुप फोटो काढून तो माध्यमांना पाठवला. मजा म्हणजे या फोटोत चोर एकटा आहे आणि त्याच्या भोवती ११ पोलीस अधिकारी कडक थाटात उभे आहेत! हे दृश्य पाहून वाटते, जणू एखादा दरोडेखोर, शार्पशूटर किंवा खतरनाक डॉन पकडल्याचा सोहळा आहे!
तुळजापूरातल्या या ‘मोबाईल मॅटर’वर एवढी पोलिसांची फौज पाहून लोकंही हसले नाहीत तर नवलच. दत्तात्रय मामांच्या मोबाईलसाठी या साहेबांनी पूर्ण ‘बाहुबली’ स्टाईलने फोटो सेशन केलंय! याला म्हणतात तर खरा ‘सुरक्षा’चा अंदाज!
