धाराशिव : जिल्ह्यातील तुळजापूर आणि येरमाळा येथे दर्शनासाठी येणाऱ्या भाविक महिलांच्या गर्दीचा फायदा घेत त्यांच्या गळ्यातील दागिने व मणिमंगळसूत्र चोरणाऱ्या आंतरजिल्हा टोळीचा पर्दाफाश करण्यात स्थानिक गुन्हे शाखेला (एलसीबी) मोठे यश आले आहे. पोलिसांनी याप्रकरणी दोन महिलांसह चौघांना अटक केली असून, त्यांच्याकडून सोन्याचे दागिने आणि एका वाहनासह तब्बल ८ लाख ३८ हजार ५०० रुपयांचा मुद्देमाल जप्त केला आहे. या कारवाईमुळे चोरीचे चार गुन्हे उघडकीस आले आहेत.
१ मे २०२६ रोजी तुळजापूर येथील श्री तुळजाभवानी मंदिरात दर्शनासाठी आलेल्या एका भाविक महिलेच्या गळ्यातील सोन्याचे गंठण अज्ञातांनी चोरून नेले होते. याप्रकरणी तुळजापूर पोलिस ठाण्यात भारतीय न्याय संहितेच्या (भान्यांसं) कलम ३०३ (२) अन्वये अनोळखी महिलांविरुद्ध चोरीचा गुन्हा दाखल करण्यात आला होता. जिल्ह्यात अशा प्रकारचे गुन्हे वाढल्याने आणि त्याचे गांभीर्य ओळखून पोलिस अधीक्षक श्रीमती रितू खोखर यांनी स्थानिक गुन्हे शाखेला या गुन्ह्यांची तातडीने उकल करण्याचे आदेश दिले होते.
दरम्यान, १५ मे २०२६ रोजी स्थानिक गुन्हे शाखेचे सहायक पोलिस निरीक्षक कासार आणि त्यांच्या पथकाला गोपनीय खबऱ्याकडून एक महत्त्वाची माहिती मिळाली. या माहितीच्या आधारे पोलिसांनी वाशी येथील पारगाव टोल नाक्यावर सापळा रचून एका स्कॉर्पिओ वाहनासह (Mahindra Scorpio) दोन संशयित महिला आणि दोन पुरुषांना शिताफीने ताब्यात घेतले. पोलिसांच्या खाक्या दाखवताच त्यांनी आपल्या इतर साथीदारांच्या मदतीने तुळजापूर आणि येरमाळा येथे भाविक महिलांचे गंठण व मणिमंगळसूत्र चोरल्याची कबुली दिली.
या धडक कारवाईत पोलिसांनी आरोपींकडून २७ ग्रॅम वजनाचे सोन्याचे दागिने आणि गुन्ह्यात वापरलेली महिंद्रा स्कॉर्पिओ असा एकूण ८ लाख ३८ हजार ५०० रुपयांचा मुद्देमाल जप्त केला आहे. चौकशीअंती तुळजापूर पोलिस ठाण्यात दाखल असलेला एक आणि येरमाळा पोलिस ठाण्यातील तीन असे एकूण चार चोरीचे गुन्हे उघडकीस आले आहेत.
अटक करण्यात आलेल्या आरोपींची नावे :
१. अनिता सुनील शिंदे
२. हिराबाई रमेश शिंदे
३. चिरंजीव रमेश शिंदे
४. किरण शेषेराव शिंदे
(सर्व रा. पिंपळगाव तांडा, ता. अंबड, जि. जालना)
पुढील कायदेशीर कारवाईसाठी अटक करण्यात आलेले आरोपी आणि जप्त केलेला मुद्देमाल येरमाळा पोलिसांच्या ताब्यात देण्यात आला आहे.
या पथकाने केली कारवाई
सदरची कामगिरी पोलिस अधीक्षक श्रीमती रितू खोखर व अपर पोलिस अधीक्षक श्रीमती शफकत आमना यांच्या मार्गदर्शनाखाली स्थानिक गुन्हे शाखेचे पोलिस निरीक्षक विनोद इज्जपवार, सपोनि सुदर्शन कासार, पोलिस हवालदार शौकत पठाण, जावेद काझी, फरहान पठाण, महिला पोलिस हवालदार शोभा बांगर, महिला पोलिस अंमलदार बहिरवाड (वाशी पोलिस ठाणे), चालक पोलिस हवालदार रत्नदीप डोंगरे आणि नागनाथ गुरव यांच्या पथकाने केली आहे.
