नळदुर्ग: आर्थिक व्यवहाराच्या कारणावरून एका ३२ वर्षीय तरुणावर कोयत्याने प्राणघातक हल्ला करून गंभीर जखमी केल्याची धक्कादायक घटना तुळजापूर तालुक्यातील होर्टी येथे घडली आहे. याप्रकरणी नळदुर्ग पोलीस ठाण्यात एका आरोपीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सुधाकर शिवाजी कुंभार (वय ३२, रा. होर्टी, ता. तुळजापूर) असे जखमी तरुणाचे नाव आहे. याप्रकरणी त्यांनी ८ फेब्रुवारी २०२६ रोजी फिर्याद दिली आहे. ही घटना ७ फेब्रुवारी रोजी सायंकाळी साडेसहा ते सात वाजेच्या सुमारास घडली.
फिर्यादी सुधाकर कुंभार आणि आरोपी नागनाथ शिवशंकर वैरागकर (रा. होर्टी) यांच्यामध्ये पैशांच्या देवाणघेवाणीवरून (आर्थिक व्यवहार) वाद होता. याच रागातून आरोपी नागनाथ याने सुधाकर यांना शिवीगाळ करत लाथाबुक्क्यांनी मारहाण केली. त्यानंतर रागाच्या भरात हातातील कोयत्याने सुधाकर यांच्यावर वार केले. यामध्ये सुधाकर हे गंभीर जखमी झाले आहेत. मारहाणीनंतर आरोपीने त्यांना जीवे मारण्याची धमकीही दिली.
याप्रकरणी नळदुर्ग पोलीस ठाण्यात आरोपी नागनाथ वैरागकर याच्याविरुद्ध भारतीय न्याय संहिता (BNS) कलम ११८(१) (धोकादायक शस्त्राने दुखापत करणे), ११५(२), ३५२ आणि ३५१(२) अन्वये गुन्हा दाखल करण्यात आला आहे. घटनेचा पुढील तपास नळदुर्ग पोलीस करत आहेत.
