कळंब तालुक्यातील शेलगाव (ज) शिवारात शेतातील बांध जाळल्याच्या कारणावरून झालेल्या वादातून एका २७ वर्षीय तरुणाला व भांडण सोडवण्यासाठी आलेल्या त्याच्या बहिणीला तिघा जणांनी मिळून शिवीगाळ करत दगड, काठी व लाथाबुक्क्यांनी मारहाण करून जखमी केले व जीवे मारण्याची धमकी दिली. ही घटना मंगळवारी, ८ एप्रिल रोजी सायंकाळी घडली असून, याप्रकरणी येरमाळा पोलीस ठाण्यात गुन्हा दाखल करण्यात आला आहे.
याबाबत सुरज दादासाहेब शिनगारे (वय २७ वर्षे, रा. शेलगाव ज., ता. कळंब) यांनी येरमाळा पोलीस ठाण्यात फिर्याद दिली आहे. फिर्यादीनुसार, मंगळवारी सायंकाळी ६ वाजण्याच्या सुमारास शेलगाव (ज) शिवारातील शेत गट नं. १७२/१७३ मध्ये संदीप भुजंग तवले, सुजीत तवले (दोघे रा. शेलगाव ज.) आणि त्यांचा एक अनोळखी साथीदार यांनी फिर्यादी सुरज यांना ‘शेतातील बांध का जाळला?’ असे विचारून शिवीगाळ करण्यास सुरुवात केली.
त्यानंतर आरोपींनी सुरज यांना लाथाबुक्क्यांनी, दगडाने व काठीने मारहाण करून जखमी केले. यावेळी फिर्यादीची बहीण भांडण सोडवण्यासाठी आली असता, आरोपींनी तिलाही शिवीगाळ करत लाथाबुक्क्यांनी मारहाण केली व जीवे ठार मारण्याची धमकी दिली, असे फिर्यादीत म्हटले आहे.
सुरज शिनगारे यांनी ८ एप्रिल रोजी दिलेल्या फिर्यादीवरून येरमाळा पोलिसांनी आरोपी संदीप तवले, सुजीत तवले व अन्य एका अनोळखी इसमाविरुद्ध भारतीय न्याय संहिता कलम ११८(१), ११५(२), ३५२, ३५१(२), ३५१(३), ३(५) अन्वये गुन्हा नोंदवला आहे. पुढील तपास येरमाळा पोलीस करत आहेत.
