उमरगा : गुन्हा करण्याच्या उद्देशाने बसस्थानकाच्या पाठीमागे अंधारात दबा धरून बसलेल्या एका इसमास उमरगा पोलिसांनी ताब्यात घेतले आहे. पोलिसांच्या सतर्कतेमुळे संभाव्य गुन्हा टळल्याची चर्चा असून, याप्रकरणी संबंधित व्यक्तीविरुद्ध महाराष्ट्र पोलीस कायद्यान्वये गुन्हा दाखल करण्यात आला आहे.
ही घटना गुरुवारी, दि. १९ जून २०२५ रोजी रात्री साडेआठ वाजण्याच्या सुमारास घडली. उमरगा पोलीस ठाण्याचे पथक हद्दीत पेट्रोलिंग करत असताना, त्यांना उमरगा बसस्थानकाच्या पाठीमागे एक इसम अंधारात संशयास्पदरित्या दबा धरून बसलेला आढळला. पथकाला संशय आल्याने त्यांनी तात्काळ त्या व्यक्तीला हटकून चौकशी सुरू केली.
चौकशी दरम्यान, त्या व्यक्तीने आपले नाव दत्ता ज्ञानेश्वर गुंजाळ (वय ३४ वर्षे, रा. बलभिम नगर पेठ, ता. जि. बीड) असे सांगितले. रात्रीच्या अवेळी अशा निर्जन ठिकाणी फिरण्याचे कारण विचारले असता, त्याने पोलिसांना उडवाउडवीची उत्तरे दिली. त्याच्या असमाधानकारक उत्तरांमुळे, तो मालमत्तेविरोधात गुन्हा करण्याच्या उद्देशानेच त्या ठिकाणी फिरत असल्याचा पोलिसांचा संशय बळावला.
त्यानुसार, पोलिसांनी दत्ता गुंजाळ याला ताब्यात घेतले. याप्रकरणी, पोलीस सरकारतर्फे फिर्यादी झाले असून, नमूद व्यक्तीविरोधात महाराष्ट्र पोलीस कायदा कलम १२२ अन्वये गुन्हा नोंदवण्यात आला आहे. पुढील तपास उमरगा पोलीस करत आहेत.
