ढोकी – येथील गट क्रमांक ३५ मधील शासकीय जमिनीवरील अतिक्रमण तात्काळ काढण्यात यावे, या मागणीसाठी आज ढोकी ग्रामस्थांच्या वतीने ग्रामपंचायत कार्यालयासमोर निषेध सभा घेण्यात आली. महाराष्ट्र शासनाच्या कृषी खात्याच्या मालकीची असलेली १६ हेक्टर ६८ आर जमीन काही विशिष्ट समाजातील घटकांनी बळकावली असल्याचा आरोप करत हे आंदोलन करण्यात आले.
याप्रकरणी यापूर्वी १ जुलै, २०२५ रोजी जिल्हाधिकारी आणि पोलीस अधीक्षक यांना निवेदन देण्यात आले होते. त्या निवेदनानुसार, १० जुलैपर्यंत अतिक्रमण न हटवल्यास गाव बंद करून राज्यमार्ग रोखण्याचा इशारा देण्यात आला होता. मात्र, जिल्हाधिकाऱ्यांच्या जमावबंदी आदेशामुळे ग्रामस्थांनी हे तीव्र आंदोलन रद्द केले होते.
त्याऐवजी, आज १४ जुलै रोजी सकाळी १० ते १२ या वेळेत दिवसभर गाव बंद आंदोलन करून ग्रामपंचायत कार्यालयासमोर निषेध सभा घेण्यात आली. ढोकी येथील गट क्रमांक ३५ मधील जमीन शासनाच्या कृषी खात्याची फळरोपवाटिका असून, गावातील काही उपद्रवी घटक या जमिनीवर वारंवार अतिक्रमण करत असल्याचा आरोप ग्रामस्थांनी केला आहे.
शासनाने लवकरात लवकर हे अतिक्रमण काढून जमीन मोकळी न केल्यास, पुढील काळात जिल्हाधिकारी कार्यालयासमोर आमरण उपोषण व इतर लोकशाही मार्गाने तीव्र आंदोलन करण्यात येईल, असा इशाराही ग्रामस्थांनी दिला आहे.
या आंदोलनात जिल्हा मजूर फेडरेशनचे माजी चेअरमन अ. गफार रशीद काझी, उपसरपंच अमोल समुद्रे, माजी पंचायत समिती सदस्य संग्राम देशमुख, भाजपचे कार्यकारणी सदस्य निहाल काझी, डॉ. बाबासाहेब आंबेडकर कारखान्याचे संचालक आयुबखा पठाण, माणिक वाकुरे, आणि माजी जिल्हा परिषद सदस्य श्रीहरी माळी यांच्यासह अनेक ग्रामस्थ सहभागी झाले होते.
Video
