तुळजापूरला ‘अस्वच्छ’ राजकारण नको; महंत इच्छागिरी महाराजांची निवडणुकीतून अलिप्त राहण्याची घोषणा!

तुळजापूर |  तुळजापूर नगरपालिका निवडणूक २०२५ च्या पार्श्वभूमीवर शहरात मोठ्या घडामोडी घडत असतानाच,सोमवार गिरी मठाचे मठाधिपती महंत इच्छागिरी महाराज यांनी एक महत्त्वपूर्ण घोषणा केली आहे. “तुळजापूरची ओळख जपण्यासाठी आणि अस्वच्छ राजकारण टाळण्यासाठी मी या निवडणुकीच्या लढतीचा भाग राहणार नाही,” असे त्यांनी स्पष्ट केले आहे. महंत योगी मावेजीनाथ महाराज, महंत इच्छागिरी महाराज आणि महंत व्यंकट अरण्य महाराज यांनी संयुक्त प्रसिद्धीपत्रकाद्वारे ही भूमिका जाहीर केली आहे.

तुळजापूरच्या पवित्र प्रतिमेचे रक्षण

गेल्या दोन वर्षांपासून श्री क्षेत्र तुळजापूरचे नाव धार्मिक व अध्यात्मिक कारणांऐवजी व्यसन, अराजकता, गैरव्यवहार आणि भ्रष्टाचारामुळे चर्चेत येत असल्याची खंत महंतांनी व्यक्त केली. तुळजापूर हे शक्तीपीठ असून येथे धर्म, परंपरा आणि मर्यादांचे पालन होणे अपेक्षित आहे. मात्र, जेव्हा समाजात अराजकता वाढते आणि राजसत्ता दिशाहीन होते, तेव्हा ‘धर्मसत्तेने’ हस्तक्षेप करून मार्गदर्शन करणे आवश्यक असते, या भावनेतून त्यांनी निवडणुकीत हस्तक्षेप करण्याचा निर्णय घेतला होता.

बिनविरोध निवडीचा प्रयत्न का फसला?

पवित्र भूमीत पैशाच्या जोरावर राजकारण होऊ नये, कारण जिथे अर्थकारणातून सत्ता येते तिथे विकासाचे मार्ग बंद होतात, असे मत महंतांनी मांडले. याच उद्देशाने शहरातील मान्यवर आणि सर्वपक्षीय नेत्यांशी चर्चा करून नगराध्यक्षपद बिनविरोध करण्याचा प्रस्ताव मांडण्यात आला होता. शुद्ध मनाने प्रशासन चालावे यासाठी सर्व पक्षांशी संवाद साधला, परंतु काही अपरिहार्य कारणांमुळे हा प्रयत्न यशस्वी होऊ शकला नाही.

उमेदवारीबद्दल तांत्रिक अडचण आणि स्पष्टीकरण

महंत इच्छागिरी महाराज यांनी भाजपकडून आणि अपक्ष असे दोन अर्ज भरले होते. भाजपची उमेदवारी न मिळाल्याने तो अर्ज बाद झाला, परंतु अपक्ष अर्ज कायम राहिला. अर्ज माघारी घेण्याच्या दिवशी वेळेअभावी प्रक्रिया पूर्ण करता आली नाही. त्यामुळे तांत्रिकदृष्ट्या त्यांचा अर्ज कायम असला तरी, “मी या निवडणूक लढतीचा भाग नाही,” असे त्यांनी स्पष्ट शब्दांत सांगितले आहे.

मतदारांना कळकळीचे आवाहन

माघार घेतली असली तरी महंतांनी तुळजापूरकरांना मतदानाचे महत्त्व पटवून दिले आहे. “आपण फक्त बटण दाबत नसून पाच वर्षांचे भविष्य ठरवत आहोत,” असे सांगत त्यांनी इतर उमेदवारांपैकी योग्य व्यक्तीची निवड करण्याचे आणि १००% मतदान करण्याचे आवाहन केले आहे.

या संपूर्ण प्रक्रियेत शहरातील ज्येष्ठ नागरिक आणि सर्वपक्षीय सदस्यांनी दिलेल्या सहकार्याबद्दल महंतांनी आभार मानले आहेत.