परंडा – येथील अयान मल्टिट्रेड एल.एल.पी. संचलित बाणगंगा सहकारी साखर कारखान्यात स्क्रॅप विक्रीमध्ये वजन काट्यात इलेक्ट्रॉनिक ‘चिप’ बसवून आणि रिमोटच्या सहाय्याने वजनात फेरफार करून तब्बल ६० ते ७० लाख रुपयांची फसवणूक केल्याचा धक्कादायक प्रकार उघडकीस आला आहे. याप्रकरणी परंडा पोलीस ठाण्यात तामिळनाडूतील कंपनी मालकासह आठ ते नऊ जणांविरुद्ध फसवणुकीचा गुन्हा दाखल करण्यात आला आहे.
नेमकी घटना काय?
बाणगंगा सहकारी साखर कारखाना (ईडा, ता. भूम) येथे १२ डिसेंबर २०२५ ते १० जानेवारी २०२६ या कालावधीत कारखान्यातील स्क्रॅप उचलण्याचे काम सुरू होते. यावेळी आरोपींनी संगनमत करून कारखान्याच्या इलेक्ट्रॉनिक वजन काट्यामध्ये एक इलेक्ट्रॉनिक चिप बसवली.
स्क्रॅप भरलेली वाहने वजन काट्यावर आल्यानंतर, आरोपी हे वजन काट्यापासून काही अंतरावर उभे राहून एका ‘डिव्हाइस’ (रिमोट) मार्फत ती चिप ऑपरेट करत असत. याद्वारे गाडीतील मालाचे वजन प्रत्यक्षात असलेल्या वजनापेक्षा खूप कमी दाखवले जात असे. या खोट्या वजनाच्या आधारे पावती (Print Slip) काढून कारखान्यातून अंदाजे १५० ते १७५ मेट्रिक टन जास्त स्क्रॅप नेण्यात आले.
अशी झाली फसवणूक
आरोपींनी वजन कमी दाखवून कमी वजनाचा मोबदला कारखान्याला दिला आणि प्रत्यक्षात शेकडो टन जास्त माल बाहेर नेला. या हाई-टेक चोरीमुळे कारखान्याचे ६० ते ७० लाख रुपयांचे नुकसान झाले आहे. यात रईस लेक कंपनीच्या सर्व्हिस इंजिनिअरने वजन काट्यात चिप बसवण्यासाठी मदत केल्याचे उघड झाले आहे.
यांच्यावर झाला गुन्हा दाखल
कारखान्याचे कर्मचारी संतोष तुळशीराम तोंडले (वय ४६, रा. कारखाना साईट) यांनी दिलेल्या फिर्यादीवरून परंडा पोलीस ठाण्यात खालील आरोपींविरुद्ध गुन्हा दाखल करण्यात आला आहे:
१. मुकादम समीर अब्दुल खादेर शेख २. संदीपान गीरमकर ३. सूर्यप्रकाश (मालक, विनमिन मेटल्स, चेंगाल्लट कांचिपुराम, तामिळनाडू)
४. सुनील ५. रईस लेक कंपनीचा सर्व्हिस इंजिनिअर ६. सूर्यप्रकाश याचे चार साथीदार
या सर्वांविरुद्ध भारतीय न्याय संहिता (BNS) कलम ३१६(२), ३१८(४), ३३८, ३४०(२), ६१(२) आणि ३(५) अन्वये गुन्हा नोंदवण्यात आला असून, पोलीस पुढील तपास करत आहेत.
