धाराशिव : राज्यात शासनाने गुटखा विक्री आणि वाहतुकीवर कडक बंदी घातलेली असतानाही, छुप्या मार्गाने राजरोसपणे गुटख्याचा काळाबाजार सुरूच असल्याचे उघडकीस आले आहे. धाराशिव जिल्ह्यातील वाशी आणि ढोकी पोलिसांच्या पथकाने वेगवेगळ्या ठिकाणी धडक कारवाया करत तब्बल १३ लाख ८२ हजार ९९० रुपयांचा प्रतिबंधित गुटखा व दोन वाहने असा मुद्देमाल जप्त केला आहे. गुरुवारी (दि. २३) झालेल्या या मोठ्या कारवाईमुळे जिल्ह्यातील गुटखा माफियांमध्ये मोठी खळबळ उडाली आहे.
वाशीत १३ लाख ७० हजारांचा मुद्देमाल जप्त
पहिली आणि मोठी कारवाई वाशी पोलीस ठाण्याच्या हद्दीत रुई शिवारात करण्यात आली. रुई शिवारातील कॅनलजवळून मोठ्या प्रमाणावर गुटख्याची वाहतूक होणार असल्याची माहिती वाशी पोलिसांच्या पथकाला मिळाली होती. त्यानुसार गुरुवारी दुपारी १२:४८ वाजेच्या सुमारास पोलिसांनी सापळा रचून महिंद्रा बोलेरो पिकअप (क्र. एमएच २३ ए.यु. ११९१) आणि अशोक लेलँड पिकअप (क्र. एमएच २३ ए.यु. ३४३९) या दोन वाहनांची तपासणी केली.
या वाहनांमध्ये ‘प्रिमियम शॉट लक्झरी टोबॅको’चे लाल-हिरव्या रंगाचे तब्बल ७४०४ पाऊच आढळून आले. पोलिसांनी ४ लाख ७० हजार ८८० रुपयांचा गुटखा आणि दोन्ही वाहने असा एकूण १३ लाख ७० हजार ८८० रुपयांचा मुद्देमाल जप्त केला आहे. याप्रकरणी वाहन चालकांवर वाशी पोलीस ठाण्यात भारतीय न्याय संहिता (BNS) कलम १२३, २२३, २७४, २७५ आणि अन्न सुरक्षा मानके अधिनियमाच्या विविध कलमांन्वये गुन्हा दाखल करण्यात आला आहे.
पळसप येथे १२ हजारांचा गुटखा पकडला
दुसरी कारवाई ढोकी पोलिसांनी पळसप (ता. धाराशिव) येथे केली. गुरुवारी सायंकाळी ६:३५ वाजेच्या सुमारास पोलिसांनी पळसप येथे टाकलेल्या छाप्यात आरोपी राजाभाऊ व्यंका माळी आणि सलीम अलम शेख (वय ४३, दोघे रा. पळसप) यांच्याकडे प्रतिबंधित गुटखा आढळून आला.
आरोपींकडे विक्रीसाठी बाळगलेला विमल पान मसाला, व्ही-१ टोबॅको, बादशाहा गुटखा, लक्झरी टोबॅको, आणि के.एम. १ जाफरानी जर्दा असा एकूण १२ हजार ११० रुपये किमतीचा माल पोलिसांनी जप्त केला. या प्रकरणी दोन्ही आरोपींविरुद्ध ढोकी पोलीस ठाण्यात भा.न्या.सं. कलम २२३, २७५ आणि अन्न सुरक्षा मानके अधिनियम कलम ५९ अन्वये गुन्हा दाखल करण्यात आला आहे.
पोलिसांच्या या धडक कारवायांमुळे अवैध धंदे करणाऱ्यांचे धाबे दणाणले असून, पुढील तपास वाशी आणि ढोकी पोलीस करत आहेत.
