मुरुम : उमरगा तालुक्यातील तुगाव (जु.) येथे एका ३१ वर्षीय तरुणाला जातीवाचक शिवीगाळ करत काठी व बेल्टने बेदम मारहाण केल्याची धक्कादायक घटना घडली आहे. या प्रकरणी मुरुम पोलिस ठाण्यात चार जणांविरुद्ध ॲट्रॉसिटी (अत्याचार प्रतिबंधक कायदा) आणि भारतीय न्याय संहितेनुसार (BNS) गुन्हा दाखल करण्यात आला आहे.
रोहीत दिपक जोमदे, पंकज शंकर जोमदे, महेश गहिनीनाथ जोमदे आणि चांद अमीर फकीर (सर्व रा. तुगाव जु., ता. उमरगा, जि. धाराशिव) अशी गुन्हा दाखल झालेल्या संशयित आरोपींची नावे आहेत. या संदर्भात भालचंद्र चोकोबा कांबळे (वय ३१, रा. तुगाव जु.) यांनी मंगळवारी (ता. १९) मुरुम पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, सोमवारी (ता. १८) संध्याकाळी साडेसहा वाजेच्या सुमारास तुगाव येथील रोहीत जोमदे याच्या द्राक्षाच्या बागेत ही घटना घडली. वरील चारही आरोपींनी संगनमत करून फिर्यादी भालचंद्र कांबळे यांना जाणीवपूर्वक जातीवाचक शिवीगाळ केली. तसेच, लाथाबुक्क्यांसह काठी आणि बेल्टने अमानुषपणे मारहाण करून त्यांना जखमी केले. एवढ्यावरच न थांबता आरोपींनी कांबळे यांना जीवे मारण्याची धमकी दिल्याचेही फिर्यादीत नमूद करण्यात आले आहे.
या मारहाणीनंतर भालचंद्र कांबळे यांनी दिलेल्या प्रथम खबरीवरून मुरुम पोलिसांनी चारही आरोपींविरुद्ध भा.न्या.सं. कलम ११८(१), ११५(२), ३५२, ३५१(२), ३(५) सह अनुसूचित जाती-जमाती अत्याचार प्रतिबंधक कायद्याच्या (ॲट्रॉसिटी) कलम ३(१)(आर), ३(१)(एस), ३(२)(व्हीए) नुसार गुन्हा दाखल केला आहे. या प्रकरणाचा पुढील तपास मुरुम पोलिस करत आहेत.
