धाराशिव: मागील भांडणाच्या कारणावरून तरुणाला शिवीगाळ करून लाथाबुक्क्यांनी तसेच लोखंडी रॉड आणि कुऱ्हाडीने मारहाण करून गंभीर जखमी केल्याची घटना ढोकी येथील धनगर गल्लीमध्ये घडली. याप्रकरणी चौघांविरुद्ध ढोकी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, बाळासाहेब भगवान कोकाटे (वय २८, रा. धनगर गल्ली, ढोकी, ता. जि. धाराशिव) यांना ५ ऑगस्ट २०२६ रोजी सकाळी सुमारे ८ वाजता आरोपींनी मागील भांडणाच्या कारणावरून शिवीगाळ करण्यास सुरुवात केली.
त्यानंतर गणेश नवनाथ कोकाटे, अशोक जालींदर कोकाटे, वैभव दिनकर कोकाटे आणि नवनाथ अर्जुन कोकाटे (सर्व रा. धनगर गल्ली, ढोकी) यांनी बाळासाहेब कोकाटे यांना लाथाबुक्क्यांनी मारहाण केली. तसेच लोखंडी रॉड आणि कुऱ्हाडीने मारहाण करून त्यांना गंभीर जखमी केल्याचे फिर्यादीत नमूद करण्यात आले आहे.
हल्ल्यानंतर आरोपींनी बाळासाहेब कोकाटे यांना जीवे ठार मारण्याची धमकी दिल्याचाही आरोप आहे. या घटनेबाबत बाळासाहेब कोकाटे यांनी १४ ऑगस्ट २०२६ रोजी ढोकी पोलीस ठाण्यात फिर्याद दिली.
फिर्यादीवरून पोलिसांनी भारतीय न्याय संहितेच्या कलम ११८(२), ११८(१), ११५(२), ३५२, ३५१(२), ३५१(३) आणि ३(५) अन्वये चौघांविरुद्ध गुन्हा दाखल केला आहे. पुढील तपास ढोकी पोलीस करीत आहेत.
