धाराशिव : मूल देण्याचे आमिष दाखवून एका व्यक्तीला तब्बल ४७ लाख ८८ हजार रुपयांचा गंडा घातल्याचा धक्कादायक प्रकार धाराशिव शहरात उघडकीस आला आहे. पैसे उकळल्यानंतर संबंधिताला लैंगिक अत्याचाराच्या खोट्या गुन्ह्यात अडकवण्याची धमकीही देण्यात आली. याप्रकरणी शहरातील आनंदनगर पोलीस ठाण्यात महिलांसह आठ जणांविरुद्ध गुन्हा दाखल करण्यात आला आहे.
धनंजय दगडू मदने (वय ३८, रा. सांजा चौक, हनुमान मंदिर परिसर, धाराशिव) यांनी यासंदर्भात फिर्याद दिली आहे. मदने यांना विश्वासात घेऊन आरोपींनी २०२० ते १७ ऑगस्ट २०२६ या कालावधीत वेळोवेळी त्यांच्याकडून रोख २५ लाख ८८ हजार आणि ऑनलाइन स्वरूपात २२ लाख रुपये, असे मिळून एकूण ४७ लाख ८८ हजार रुपये उकळले. पैसे घेतल्यानंतरही मूल न देता आरोपींनी त्यांची फसवणूक केली. तसेच दिलेले पैसे परत मागितले असता लैंगिक अत्याचाराचा खोटा गुन्हा दाखल करण्याची धमकी दिली.
यांच्यावर दाखल झाला गुन्हा :
-
अश्विनी श्रीराम पाटील (रा. कार्ला, ता. तुळजापूर)
-
पार्वती उत्तम देवकते (रा. कार्ला, ता. तुळजापूर)
-
भुजंग उत्तम देवकते (रा. कार्ला, ता. तुळजापूर)
-
रेश्मा भुजंग देवकते (रा. कार्ला, ता. तुळजापूर)
-
श्रीदेवी दत्ता नन्नवरे (रा. येलमवाडी, ता. मोहोळ, जि. सोलापूर)
-
दत्ता नन्नवरे (रा. येलमवाडी, ता. मोहोळ, जि. सोलापूर)
-
जयश्री धुळुबा शिरगिरे (रा. तेर, ता. जि. धाराशिव)
-
दत्ता गंडदे (रा. पुणे)
फिर्यादीच्या तक्रारीवरून आनंदनगर पोलिसांनी वरील सर्व आरोपींविरुद्ध भारतीय न्याय संहिता (BNS) कलम ३१८(४), ३५२, ३५१(२), ३५१(३) आणि ३(५) अन्वये गुन्हा नोंदवला असून पुढील तपास पोलीस करत आहेत.
