ढोकी (धाराशिव) : ढोकी शहरातील आझाद चौक परिसरात दोन गटांमध्ये जुन्या वादातून तुफान दगडफेक झाल्याची घटना घडली. या हाणामारीत दोन्ही बाजूंचे आठ जण जखमी झाले असून, परिसरात प्रचंड दहशत निर्माण झाली होती. याप्रकरणी ढोकी पोलीस ठाण्यात २४ जणांविरुद्ध भारतीय न्याय संहितेअंतर्गत विविध कलमांन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, रविवारी (दि. १६ ऑगस्ट) सायंकाळी साडेसात ते आठ वाजण्याच्या सुमारास आझाद चौकातील डॉ. लोमटे यांच्या दवाखान्यासमोर ही घटना घडली. दत्तनगर पारधी पिढी आणि राजेशनगर पारधी पिढी येथील दोन गट समोरासमोर आले. दोन्ही बाजूंच्या जमावाने एकमेकांवर जीवघेणा हल्ला करण्याच्या उद्देशाने जोरदार दगडफेक सुरू केली.
दगडफेकीत हे झाले जखमी :
-
बापू बन्नू शिंदे
-
अनिल दादा शिंदे
-
सुनील दादा शिंदे (तिघे रा. दत्तनगर पारधी पिढी, ढोकी)
-
बाबासाहेब आप्पा चव्हाण
-
राजेंद्र गुलाब चव्हाण
-
तोळाबाई बाबासाहेब चव्हाण
-
आनंद शामराव पवार
-
बिसराम बन्सी पवार (सर्व रा. ढोकी)
या घटनेची माहिती मिळताच पोलिसांनी घटनास्थळी धाव घेऊन परिस्थिती नियंत्रणात आणली. याप्रकरणी पोलीस नाईक रविकांत मधुकर जगताप यांनी दिलेल्या फिर्यादीवरून बबलू रामचंद्र काळे, शेषनाथ राजू काळे, दत्तू बिसराम पवार, राहुल भीमराव पवार, बापू बन्नू शिंदे, शिवकुमार रमेश काळे, रमेश बब्रू काळे, राजेंद्र बब्रू काळे, आनंद शामराव पवार, बिसराम बन्सी पवार यांच्यासह इतर १४ अशा एकूण २४ जणांवर भा.न्या.सं. कलम ११०, १८९(२), १८९(३), १९१(२), १९१(३), १९० आणि ३२४(४) अन्वये गुन्हा नोंदवला आहे. या प्रकरणाचा पुढील तपास ढोकी पोलीस करत आहेत.
