धाराशिव – विधानसभा निवडणूक जवळ आल्याने भाजप आमदार राणाजगजितसिंह पाटील यांनी विकास कामांचा वेग वाढवला आहे. उद्या, ११ ऑक्टोबर रोजी, कौडगाव (बार्शी हद्द) ते बोरफळ आणि तीर्थक्षेत्र तुळजापूर ते तीर्थक्षेत्र तेर या दोन मार्गावरील ६२५ कोटी रुपयांच्या रस्त्याच्या कामाचे भूमिपूजन होणार आहे.
हा नवीन रस्ता बार्शी हद्द येथून सुरु होणार असून धाराशिव शहर, सांजा, पाडोळी, चिखली मार्गे औसा तालुक्यातील बोरफळपर्यंत जाणार आहे, तर दुसरा रस्ता तुळजापूर ते तेर पर्यंत जाणार आहे, ज्यामुळे या भागातील वाहतूक सुलभ होईल. भूमिपूजन सोहळा सकाळी ११ वाजता चिखली चौरस्त्यावर आयोजित करण्यात आला आहे.
हा रस्ता राज्याचे उपमुख्यमंत्री देवेंद्र फडणवीस यांच्या माध्यमातून मंजूर झाल्याचे भाजप आमदार राणा जगजितसिंह पाटील यांनी सांगितले. मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार हे ऑनलाईन उपस्थित राहणार असल्याचे सांगण्यात आले.
