धाराशिव : धाराशिव शहरातील मतदार यादी भाग क्रमांक 333 मधील बूथ लेव्हल ऑफिसर (BLO) यांनी एका राजकीय पक्षाच्या कार्यालयात बसून SIR चे काम केल्याचा आरोप भारतीय जनता पक्षाने केला आहे. संबंधित BLO यांनी निवडणूक आयोगाच्या सूचनांचे उल्लंघन करून कर्तव्यात कसूर केल्याचा दावा करत त्यांच्यावर योग्य ती कारवाई करण्याची मागणी भाजपने जिल्हाधिकारी तथा जिल्हा निवडणूक अधिकाऱ्यांकडे केली आहे.
भाजपचे जिल्हा सरचिटणीस अॅड. नितीन भोसले आणि धाराशिव-कळंब विधानसभा मतदारसंघाचे BLA-1 अॅड. दत्तात्रय देवळकर यांनी सोमवारी (दि. 14 जुलै) याबाबत निवेदन दिले आहे.
धाराशिव शहरात SIR अंतर्गत फॉर्मचे वितरण करणे आणि मतदारांकडून फॉर्म भरून घेण्याची प्रक्रिया निवडणूक विभागाकडून राबविली जात आहे. या प्रक्रियेत BLO यांनी संबंधित मतदारांच्या घरी जाऊन फॉर्म देणे आणि भरून घेणे अपेक्षित असल्याचे भाजपने निवेदनात म्हटले आहे. यामुळे मतदारांची प्रत्यक्ष पडताळणी नियमानुसार होण्यास मदत होते, असेही निवेदनात नमूद करण्यात आले आहे.
मात्र, धाराशिव शहरातील मतदार यादी भाग क्रमांक 333 मधील BLO सय्यद जुनेद कादरी हे एका राजकीय पक्षाच्या कार्यालयात बसून SIR चे काम करत असल्याचे निदर्शनास आल्याचा आरोप भाजपने केला आहे. यासंदर्भातील बातम्या वर्तमानपत्रांत प्रसिद्ध झाल्या असून समाजमाध्यमांवरही व्हिडिओ प्रसारित झाल्याचे निवेदनात म्हटले आहे.
संबंधित BLO यांनी प्रत्येक मतदाराच्या घरी जाऊन आवश्यक प्रक्रिया पूर्ण करणे अपेक्षित असताना तसे होताना दिसत नसल्याचा दावा भाजपने केला आहे. निवडणूक आयोगाच्या सूचनांचे पालन न करता एका राजकीय पक्षाच्या कार्यालयात बसून काम केल्यामुळे संबंधित अधिकाऱ्याने कर्तव्यात कसूर केल्याचा आरोपही निवेदनातून करण्यात आला आहे.
“अशा पद्धतीने काम झाल्यास चुकीची मतदार नोंदणी होण्याची शक्यता आहे. त्यामुळे या प्रकरणाची चौकशी करून संबंधित BLO वर योग्य ती कारवाई करण्यात यावी,” अशी मागणी भाजपचे जिल्हा सरचिटणीस अॅड. नितीन भोसले आणि अॅड. दत्तात्रय देवळकर यांनी केली आहे.
